باخیش
یکشنبه 14 اردیبهشت 1393
بؤلوم | حج یازار : نژادمحمد

آتا ميراثي  
      
ارافا - آدمله حوّانين گؤروش يئري. 
كعبه - آدمين اينسانليغا “ائو” ميراثي. 
صفا و مروه تپه‌لري - حاجرله ايبراهيمين آيريليق مكاني.  

حاجر، هيجرتين گليني. 
ايبراهيم، آتشين قنيمي. 
ايسماييل، قوربانليغين سيموولو. 

آدم اينسانليغين ايلك ائويني تيكدي. بيزه “ائو” آنلاييشيني ميراث قويدو.  
آدم ياساق اولمايان جنّته گئده بيلمك اوچون ياساق اولان جنّتيندن هيجرت ائتدي. ارافادا حوّاسينا قوووشدو. اوردا مسكن سالدي و اينسانليغا، - بوتون واريثلرينه، - بير ائو ميراث قويدو. كبه هر كسين "آتا يوردو" اولدو... 

ايبراهيم ايسماييللا اونو برپا ائتدي و ميراثيميزا صاحب چيخماغي اؤيرتدي بيزه. 
و بير ده بوتون واريثلري آتا يوردونا، - باشلانغيجا، - دعوت ائتدي… 
بيزي تاريخه سياحت ائتمه‌يه سسله‌دي. ائوين نه دئمك اولدوغونو آنلاماغيميزي ايسته‌دي…  

بير گون حاجه‌ر ده هيجرت ائتدي… 
ايبراهيم ربّي‌نين امري ايله ايكي جييرپاره‌سيني او تورپاقلاردا امانت اولاراق قويوب گئتدي. اينسان ياشامايان، قوش اوچمايان، تيكان بئله بيتمه‌ين بو اراذيلره ايبراهيم عائله‌‌‌سي صاحب چيخدي. آتا اوجاغي‌نين ايشيغيني يانديردي. و بوتون اينسانلاري بو ايشيغا سسله‌دي… 

حاجر هيجرته يولا چيخدي… 
سئوديكلري‌نين خطري اوچون بو رولو اوينادي. 
ربّيني سئويردي. قدرينه تسليم اولدو. 
ايبراهيميني سئويردي. اونا قارشي چيخمادي. اونو تنها بير صحرادا قويوب گئدركن آغلامادي، سيزلامادي… آرخاسيندا بوراخديغي راحت ياشاييشي اوچون عصيان ائتمه‌دي. 
ايسماييليني سئويردي. اونو قوروماق اوچون “ساي” ائتدي. دورمادان، دايانمادان، اوسانمادان. سويو تاپانا قدر يورولدوم، اوسانديم، بئزديم دئمه‌دي. “ساي” ائده بيلن هر كسه “سونوندا زم-زم” وار مئساژيني وئردي. زم-زم آرتيق كشف اولونوب. يئري ده بلليدير. عامّا نه قريبه‌دير كي، ساي ائتمه‌دن زم-زم ايچيلمير. زم-زمه قوووشماق اوچون حاجه‌رين رولونو اويناماق واجيبدير. زم-زم زحمتله الده اولونان نعمتدير. قدري بيلينمه‌سي، ديَري آنلاشيلماسي اوچون “قاچيش” لازيمدير.  

آدم آتاميز بيزه كعبه‌ني ميراث قويدو. 
حاجه‌ر آناميز زم-زمي… 

ايبراهيم اونو ربّينه امانت ائديب گئتميشدي. حاجه‌ر ده جييرپاره‌سيني ربّينه امانت ائده‌رك صفا – مروا تپه‌لري آراسيندا آختاريشا چيخدي. اونو هيجرته يوللايان ربّي اونو كيمسه‌سيز و چاره‌سيز بوراخماياجاقدي. حاجه‌ر بونو بيليردي. لاكين گؤيلردن معجزه‌‌ گؤزلميردي. اونون اوچون تسليميّت عطالت دئييل، حركت ايدي. سو آختاريشينا چيخماقلا سانكي ربّي‌نين قدرينه تسليم اولدوغونو بَيان ائتدي: "بورايا گؤندريلمم مصلحتديرسه، دئمه‌لي بورادا منيم ده، اؤولاديمين دا ياشاييشي اوچون احتياجيميزي اؤده‌يه‌جك قدر روزي ده وار" دئيه دوشوندو. حاجه‌ر، او روزيني اؤزو اوچون دئييل اينسانليق اوچون آختاريردي. اونا گؤره ده زم-زم بوتون اينسانليغين اوتراق ميراثيدير. كعبه كيمي… 

زم-زمين كشفي ايله ايبراهيمين دوعاسي دا گئرچكلشميش اولدو: "ربّيم! من نصليمي سنين موقدس ائوينين يانينا، اكينچيلييه ال‌وئريشسيز بير وادييه يئر‌لشديرديم. ربّيم! قوللوق ائتسينلر دئيه، بئله ائتديم. اينسانلارين كؤنوللريني اونلارا مئيل ائتدير. شوكور ائتمه‌لري اوچون اونلاري محصوللارلا روزيلندير". [حجّ،37] 
ايللر سونرا گئري قاييدان ايبراهيم بو واديده تنها بوراخديغي عائله‌‌‌سي‌نين ربّي طرفيندن نئجه قوروندوغونا شاهيد اولدو: ربّي اونون دوعاسيني قبول ائتميش، “اينسانلارين كؤنوللريني اونلار مئيل ائتديرميشدير.” 
آرتيق حجر تك دئييلدي. زم-زمه قوووشماقلا حاجه‌ر تنهاليغين “داشيني آتدي”. داها هئچ بير زامان تك اولمادي... 

او موقدس تورپاقلارا گئدن هر كس حاجر اولور، صفا-مروه آراسيندا سو آختارير. ايللرين اونون اوزرينده بوراخديغي هيسيني، كيريني، پاسيني تميز‌له‌مك اوچون “زم-زم” آختاريشينا چيخير. بضا او سو “گؤز ياشي” اولور، اوزوندن قلبينه آخير، زم-زمه قاريشير... بوتون گوناهلاريني او گؤز ياشي يويور، "حاجه‌ر" اولوب گوناهدان ثاوابا هيجرت ائدير. بضا او سو “آلين تري” اولور. اومّتين يوكونو چكن، دردينه يوكلنن اينسانلارين آلين تري... 

او تورپاقلارا گلن هر كس: "ائي ربّيم! آتام آده‌مين تيكديگي، ايبراهيمين برپا ائتديگي ائوين باشينا دؤنمك اوچون، گوناهلاردان تميزله‌نيب تزه دوغولموش كيمي گوناهسيز اولماق اوچون من ده گلديم. اؤز آتا يوردوما، ايستي اوجاغيما گلديم. تام تسليميّته گلديم. آتام ايبراهيم چاغيردي، گلديم. آنام حجرين تسليميّتيني ياشاماغا گلديم. كونفورتومو و راحتليغيمي ترك ائديب، ايلك باشلانغيجا دؤنمك، كيم اولدوغومو بيلمك، اصل ديَرلري آنلاماق اوچون گلديم...” 
سئونلرين ووصال يئري اولان كبه‌يه گلديم.  
آيريليقلارين بيتديگي مكانا گلديم.  
اينسانليغين اورتاق ديَرلرينه صاحب چيخماغا گلديم. 
واريثم! ورثه‌‌‌ليگيمي تصديقه گلديم! 
ايسماييليمين دوداقلاري سوسوزلوقدان جادار-جادار اولوب. اونا زم-زم آختارماغا گلديم. ساي ائتمه‌يه گلديم.  
سنين دعوتينه گلديم... 
قبول ائدرسنمي؟!"

باخیش

ياشاديغينيز سيزجه حياتديرمي؟ 

هله ده نفس آليرسينيزسا بير دوشونون! هله نه قدر ياشايا بيلرسينيز؟ حياتا گليش سببينيزه نظر يئتيرين. هارداسينيز؟ كيملرله‌سينيز؟ خوشبختسينيزمي؟ سيزي سيزدن بئله ياخشي تانييان ربّينيزي، نه قدر تانيييرسينيز؟ اؤزونوزه سوال وئرمكدن قورخمايين.  

اؤزونوزو تانييين، او سيزي ربّيميزه آپاراجاقدير. گئج اولمادان كيم اولورسونوزسا اولون، نه ائتميسينيزسه هتدا نه قدر پيس عمل ائتميشسه‌نيز، تؤوبه ائتميي باجارين. ربّيميز سيزي باغيشلاياجاقدير، سيز اونون يوللاريندا ايلرله‌ديكجه.  

بير كيمسه سيزه، هئچ بير قارشيليق گؤزله‌مه‌دن اللريني اوزادير. موسلمان بير قورو كليمه‌دير اينسانا يوكلنن، سرحدلرينيزي آشين و دوشونون گؤزلرينيزي باغلاديقدا؛ سيزده اولان فرقليلييه بير باخين. ديَيشمك سيزي ياخشيليغا و گؤزللييه آپاراجاقدير. سيز ايسته‌ميي بيلين، هر شئي سيزين الينيزده اولاجاقدير. تكي اينسان اولسون اونون امرينه عمل ائدن.  

ياشاماق بير نفس آلماق قدر آساندير، بير او قدرده چتيندير. آلديغيميز نفسلري سايا بيلمريك. آلا بيلمه‌ديگيميز نفسلره ايسه هر كس دؤرت گؤزله باخار. لاكين اونوتمايين، بيز وار اولماق مجبوريّتيندييك. مؤمينلر اللهين يئروزونده كي، خليفه‌لريدير. اونلار هر شئيه الله اوچون باخارلار، دقت ائدرلر، سئوگيلريني اللهلاريندان آلارلار. اونون نعمتي اولان قلب، بئله ايشله‌مه‌ليدير. او بير ات پارچاسي دئييلدير كي، ساده‌جه قاني ايداره ائتسين. او اوركدير، سئوگيميزي اونا دولدوروروق، اورا دوشر آلوولار و هوزونلر، اونونلا خوشبختليگيميزي باشا دوشريك. هيجان اونونلا گؤزلدير! 

موسلمان، سن گؤزللييه گئدن يولو تيكمه‌يه طالب اولان، قالخ و اؤزونه بير باخ! حيات بير آلداتما آلتي كيمي سني سندن اوغورلايير. زامان سنين لئهينه ايشله‌مك يئرينه، علئيهينه ايشله‌يير. ترصينه چئويرمك ائله آساندير كي. بيراز گؤزياشينا بولانميش كؤنلون اورگين اولسون، بسدير…

باخیش
دوشنبه 13 خرداد 1392
بؤلوم | عومومي یازار : نژادمحمد

اللهلا گؤروش

1-اينسان: اللهيم، سني نئجه گؤروم؟

الله: گؤزلر مني گؤرمز، من گؤزلري گؤره‌رم.

2-اينسان: اللهيم، حيات نه دير؟

الله: حيات سنين منه اولان باغليليغين، مني اؤزونده ياشاتماغيندير.

3-اينسان: اللهيم، نور نه دير؟

الله: نور منم.

4-اينسان: اللهيم، سن هاراداسان؟

الله: منيم مكانيم يوخدور، من سنه شاه داماريندان دا ياخينام.

5-اينسان: اللهيم، سني نئجه تانيياق؟

الله: اطرافينا نظر سال، من هر يئرده‌يم.

6-اينسان: ثاواب و گوناه نه دير؟

الله: ثاواب سني منه ياخينلاشديران، گوناه سني مندن اوزاق سالان عمللريندير.

7-اينسان: اللهيم، سنين راضيليغيني نئجه قازاناق؟

الله: مني - منه خاطير چاغير، منه - منه خاطير عبادت ائت.

8-اينسان: جنّت و جهنّم نه دير؟

الله: جنّت مؤمينلرين حسرتينده اولان، جهنّم ايسه گوناهكارلارين عمللري ايله قازانديقلاري مكاندير.

باخیش
دوشنبه 26 فروردین 1392
بؤلوم | حج یازار : نژادمحمد

ارافاتدا مريفته دوغرو

"حجّ عرفه‌دير."

زيلهيججه‌نين دوققوزونجو گونو گونش، – او دا سنه شاهيد اولاجاق، – دوغولدوقدان سونرا مريفتين بئشيگي ارافاتين يوللارينا دوشمه‌ليسن. مومكونسه او يوللارا پايي – پيادا دوش. آياغي‌نين ايزي، پئيغمبرلرين آياق ايزينه قاريشسين.

ارافاتا چيخاركن اؤزونو جنّتيني ايتيرميش بير آدم كيمي حيسس ائتمه‌ليسن. اونوتما، دوغولدوغوندا ترتميز ايدين، صاف ايدين. يعني كي، جنّت سن ايدين. اللها وئرديگين سؤزو سونرالار پوزدون. صافليغين ايتدي. كيرلندين. پوزولدون. اؤزونه قارشي يادلاشدين. حقيقته قارشي يادلاشدين. اللها و اشيايا قارشي يادلاشدين.

بو يادلاشما سني اؤزونه قارشي داوالي بيرينه چئويردي. اؤزونله هئچ باريشيق اولا بيلمه‌دين. سنين اوچون گله‌جك ناراحات، كئچميش حوزنلو ايدي. امينليگيني و آزادليغيني ايتيردين.

بونلاري ايتيرن قورخونج بير ديَر ايتكيسينه مروز قالار. اعتراف ائت كي، سن ده ائله اولدون. ديَرلرين آلت-اوست اولدو. آرتيق سنين گؤزونده ديَرسيز اولان قيمتلي اولانلا، آلچاق اولان اوجا اولانلا، كئچيجي اولان قاليجي اولانلا، يالان اولان گئرچك اولانلا يئر ديَيشديردي. دونياني الده ائتمك اوچون آخيرتي وئردين. اِحتيراسينا صادق قالماق اوچون عشقينه خيانت ائتدين. اينستينكتلري‌نين دويومسوز سئلينه قاپيليب اؤزونه پيسليك ائتدين. منليگيني راضي ائتمك اوچون اللهي ناراضي ائتدين.

بوتون بونلاردان سونرا بير ويرانه كيمي گليب داياندين ارافات تپه‌لري‌نين/مريفت تپه‌لري‌نين اتكلرينده.

الله دا سندن محض بونو گؤزله‌ييردي. گوناه ايشله‌مه‌مه‌ييني دئييل، تؤوبه ائتمه‌ني گؤزله‌ييردي. موكممللشمه‌ييني دئييل، كاميل اولماماغيني اعتراف ائتمه‌ييني گؤزله‌ييردي. اوميد كسمه‌ييني دئييل، آستاناسينا باش قويوب ياش تؤكمه‌ييني گؤزله‌ييردي.

سؤزون مغزي، ملكلشمه‌ييني دئييل، "اينسان" اولماغيني گؤزله‌ييردي.

هر شئيدن ده باشقا اؤز اؤزونله، يادلاشديغين حقيقتله يئنيدن تانيش اولماغيني، فطرتينله، ويجدانينلا تكرار گؤروشمه‌ييني گؤزله‌ييردي.

چونكي، بورا ارافاتدير. ارافات، تانيماق معناسيني وئرن "مريفت" مصدريندن تؤره‌ديلميش بير آددير. بيلديگين و ايستيفاده ائتديگين عاريف، مريفت، ايرفان، مشهور عيني معناني وئرن سؤزلردير. مريفت، بيلمكدن اوستون بير شئيدير. هر مريفت بيلميي ده اِحتيوا ائدير. مريفت بير شئيين اؤزونو تانيماق، سيرّينه چاتماق، اصلينه واقيف اولماقدير. اشياني و وارليغي اولدوغو كيمي قاورايا بيلمكدير... محض بودور مريفت. عالملره رحمت حضرتي محمّد، اونا گؤره تئز-تئز بئله دعا ائدردي:

ايلاهي! ارينعل-اشياه كاهي!

["اللهيم! منه اشياني اولدوغو كيمي، اؤز حقيقتي ايله گؤستر!"]

محض بو آندا اوزرينده اولدوغون ارافات، مريفت يئريدير. آدم، اؤز حقيقتيني، عاجيزليگيني، باجاريقسيزليغيني، حدلريني اورادا تانيدي. آدم، ارافاتدا آدام اولدو.

سن ده آدم‌اوغلوسان و اؤزونله تانيش اولماغا گلدين. حيكمتين ان اسكيلمز دوستورودور: اؤزونو تانييان ربّيني تانييار. اگر اؤزونو تانيسان، ربّيني ده تانيياجاقسان. ساده‌جه ربّيني دئييل اشياني، اينساني، دوستو، دوشمني، اوجاني، آلچاغي، قاليجيني، كئچيجيني تانيياجاقسان.

اؤزونله تانيش – بيليش اولمادان نه ائده بيلرسن كي؟

سرحدلريني، ايمكانيني، ايمكانسيزليغيني يعني حدآيني و حدودونو بيلمه‌دن ائده‌جه‌يين هر ايشي يوزونه، گؤزونه بولاشديرماغين قاچينيلمازدير.

تانيش اولدوم دئديكلريندن ايللر سونرا خيانت گؤردويونو، اورگي‌نين قبيريستانليغا دؤندويونو، ان آغير آجيلاري ان ياخي‌نيندا اولانلاردان چكديگيني سؤيله‌ييرسنسه، دئمه‌لي سنين تانيماق و تانيش اولماقلا علاقه دار جدي بير پروبلئمين وار. باخ اصل فورصتدير. ايندي "تانيماقلا" تانيش اولا بيلرسن. چونكي بو تورپاقلار، اوزرينده دايانان عاريفه، مدنيّتي اؤيره‌دن مريفت دياري ارافاتدير.

ارافات يالنيز تانيش اولما يئري دئييل، عيني زاماندا هم ده گؤروشمه يئريدير: حوّانيزلا، حوّالارينيزلا. حوّا يالنيز بير حيات يولداشي دئييل بير جان يولداشي، بير يول يولداشي، بير داوا قارداشي، بير اورك دوستودور. ايتيرديگينيز نه قدر اورگي، – باشدا اؤز اورگينيز اولماقلا، – ارافاتدا تاپارسينيز. حوّا سيزي احاطه‌‌ ائدن دوستلارينيز، موحيطينيزدير. موحيط؛ يعني هم جهنّمينيز، هم جنّتينيز.

‘وقفه‌يه دايانماق'

وقفه اونسوز دا "دوروش" دئمكدير. بو حالدا "وقفه‌يه دايانماق" ايفاده‌سي سهو دئييلمي؟ خئير، دئييل. عكسينه وقفه‌يه دايانماق ايفاده‌سي حادثه‌‌نين اؤزونه دقت چكن چوخ معنالي بير ايفاده‌دير.

چونكي، وقفه‌يه دايانماق، "دوروش باره‌سينده دوشونمك"، "دوروش باره‌سينده تفكّور ائتمك" دئمكدير. دوروش، يعني سيزين فرد اولاراق دوروشونوز، هارادا دوردوغونوز، نَيه قارشي دوردوغونوز، نَيين و كيمين يانيندا دوردوغونوز، نئجه دوردوغونوز، نه اوچون دوردوغونوز؟

وقفه هر كسين اؤز دوروشونا نظارت ائتمه‌سيدير. اوّل فردي و شخصي دوروشونا. اينسان اؤزونه قارشي هارادا دايانيب؟ اورگي‌نين يانيندامي، حيسسلري‌نين يانيندامي؟ عاغيلي‌نين يانيندامي، اينستينكتلري‌نين يانيندامي؟ ايماني‌نين يانيندامي، شيطانين يانيندامي؟ فطرتي‌نين ياخي‌نيندامي، اوزاغيندامي؟

داها دوغروسو حقيقتاً بير يئرده دايانيرمي؟ يوخسا باشي بوش بوراخيلميش، ايستيقامتيني ايتيرميش، سوكاني قيريلميش، فيرتينايا دوشموش بير گمي كيمي، اورادان اورايا چيرپيليب پارچالانماغيمي گؤزله‌يير؟

بير يئرده دايانيرسا، نه اوچون اورادا دايانير؟ دايانديغي يئري اؤزومو سئچيب، يوخسا كيملرسه تلقين ائديب؟ تصادوفاًمي اورادا دايانيب، شعورلو اولاراقمي؟ يعني، دايانديغي يئره بلدديرمي؟

بير ده اينسانين اجتماعي دوروشو وار: باشقالارينا قارشي دوروشو نئجه‌دير؟ يولداشينا، دوستونا، عائله‌‌سينه، جمعيّتينه قارشي هارادا يئر آليب؟ اجتماعي و سياسي حادثه‌‌لرده هارادا، كيملره قارشي، كيملرين يانيندا دايانير؟

مثلا ايبراهيمله بيرليكده بوته و بوتچولره قارشي دايانيب، يا ايبراهيمه قارشي بوتچولرين يانيندامي؟ قورآنداكي ايفاده‌سييله شيطانا قارشي "اللهين هيزبييله"مي دايانيب، يا اللها قارشي "شيطانين هيزبييله"مي؟ ظاليملارين و تاغوتلارين صافيندا دايانيب، يوخسا مظلوملارين و ازيلنلرين صافيندا؟

ارافاتداكي بو دوروش ايكي يئرده بير ده تكرارلاناجاق. بيري مشاريلهارامين اولدوغو موزده‌ليفه‌ده، ديگري مينادا. موزده‌ليفه‌دكي دوروش، كبه‌نين اتكلرينده اللهين حضورونا چاتماميشدان اوّلكي ايكينجي تميزلنمه مكانيدير. مينا ايسه شيطاني اينستينكتلرله حِسابلاشيب، اللهين حضورونا موقاويله يئني‌له‌مك اوچون ترتميز، باغلانتيسيز، قئيد – شرطسيز چاتماق اوچون سون تميزلنمه يئريدير. ارافاتدا اؤزونوزله تانيش اولدونوز، مريفته يوكسه‌ليب حدآينيزين عاريفي اولدونوزسا، ايندي ائديله‌جك يئگانه شئي قاليب: دعا...

دعا...

باخیش
یکشنبه 15 بهمن 1391
بؤلوم | عايله یازار : نژادمحمد

"اوچونجو" جينس؟!

اينسانليق مدنيتي‌نين اساسيني قادين و كيشي‌نين سوسيال حياتداكي موناسيبتلري تشكيل ائدير. بونا گؤره ده تاريخين ايلك دؤورلريندن بو گونه قدر فيلوسوفلاري، علم آداملاريني هر زامان بير سوال ناراحات ائدير: "مدنيت كيشييه هر دؤورده ديَر وئرركن نَيه گؤره قاديني بوندان محروم بوراخميشدي؟ اونون گوناهي نه دير؟ نَيه گؤره قادين هر زامان جمعيت طرفيندن تحقير اولونموشدور؟..."

قادي‌نين بو حالي عربيستاندا ايسلام دينينين بير گونش كيمي دوغولوشو ايله سونا چاتميشدير. او واختا قدر هوررييت و مولكيت حقوقوندان محروم ائديلن، كؤله سويه‌سينده اولان، بير اشيا كيمي آلينيب-ساتيلان، گوناه و پيسليكلرين قايناغي اولاراق گؤرولوب، وارليغينا اؤنم وئريلمه‌ين بير دورومدا ايكن، ايسلام دينينين گليشي ايله حاقي اولان اوستون ديَريني تاپميش، سوسيال حياتدا يئريني آلميشدير.

بئله كي، ايسلام، توپلومون فردلري ايله [كيشي، قادين و اوشاقلار] ماراقلانان و اونلاري ان گؤزل شكيلده تربييه ائدن بير قانوندور.

ايسلام، وئرديگي تربييه ايله اينسانلاري جهالتدن دوغان آزغينليقلاردان، دولاييسي ايله ايضطيرابلاردان، بدبختليك و يانليشلاردان خلاص ائدير.

ايسلام، اينسانليق وظيفه‌‌لريني هر شئيدن اول كيشي ايله قادين آراسيندا عدالتلي شكيلده بؤلور و نيظاملايير. بو بؤلگوده قادين و كيشي‌نين فطري ايستئدادلاري گؤز اؤنونده توتولموشدور. اينسانين ياراديليشي‌نين طلب ائتديگي وظيفه‌‌لريندن باشقا ديگر ايستيقامتلرده‌كي فعاليتي‌نين نتيجه‌سي هر زامان آجيناجاقلي اولور.

چونكي فطرت، "زامان اينكيشاف ائديب و يا ياخود دا گئري قاليب، بونا گؤره ده زامانلا آياقلاشماق لازيمدير" دئيه بير قانون تانيمير. فطرتين، زامانلا هئچ بير علاقه‌‌سي يوخدور.

بئله كي، گونوموزده زامانا اويان مودئرن حياتي هر بيريميز گؤروروك؛ تارازليغي پوزولاراق سرعتله ايره‌لييه آتيلميش، آرديندان دا يالنيز قادينلاري دئييل، كيشي و اوشاقلاري دا سورويه‌رك ايضطيراب و آجيلارلا بوغموش، پيسليكلرين قوللاري آراسينا آتاراق مهو ائتميشدير.

گونوموزون جاهيليه‌سي، قاديني “اوچونجو بير جينس” حالينا گتيرميش، اللهين ياراتديغي فطرتي ديَيشديرميشدي. قاديني ائودن، عائله‌‌دن اوزاقلاشديراراق “سرحدسيز آزادليق” ناغيللاري ايله آلداتميشدير كي، بو دا جمعيتين عومومي بير بدبختليگينه سبب اولموشدو. نه عائله‌‌، نه ائو، نه ده كي، گله‌جك دئيه بير شئي قالماميشدي.

بونو نتيجه‌سي اولاراق دا قادين، قادين اولماقدان چيخديغي كيمي، كيشي اولماق آرزوسونا دا قوووشا بيلمه‌ميشدير. اورتايا قاريشيقليقلا بيرليكده توكورپه‌ديجي بير شئي چيخميشدير: قادينلا كيشي آراسيندا اولان بير اوچونجو جينس دوغولموشدور. بو، قادينليغي‌نين ديَريني بيلمه‌ين قادينا بير جزا اولدوغو كيمي، اونو بو حالا سالان جمعيته ده بير جزادير. گونوموزون سؤزده مدني، حقيقتده ايسه جاهيل اولان اينسانلاري نه بونو، نه ده كي، قادينا حقيقي يئريني، ديَريني ايسلامدان باشقا هئچ بير سيستمين وئره بيلمه‌يه‌جه‌ييني آنلايا بيلرلر.

باخیش
پنجشنبه 2 آذر 1391
بؤلوم | عومومي یازار : نژادمحمد

اللهيم!

قانادي قيريق بير قوش كيمييم.

اوچسام اوچا، قاچسام قاچا بيلميرم.

ياريمچيق قالميش يوخو كيمييم.

ياردان دا، سردن ده كئچه بيلميرم.

او سونسوز سئوگي سئلينه بيزي ده قات: سئو بيزي!

سن سئونده سئوديررسن: سئودير بيزي!

سئوديگيني جنّتينله سئوينديررسن: سئويندير بيزي!

مادده‌دكي هر آتومون تسبيح ائتديگي سنسن!

نفس آلان هر جانلي‌نين ذكر ائتديگي سنسن.

عاغيل امانت ائتديگين هر وارليغين عقل ائتديگي سن

دويان و دويدوران هر دويغونون حيسس ائتديگي سنسن.

قدير-قييمت بيلنلرين شوكر ائتديگي سنسن،

وارليغي نعمت بيلنلرين حمد ائتديگي سنسن

باخیش
سه شنبه 18 مهر 1391
بؤلوم | پئيغمبرلر یازار : نژادمحمد

عيسي پئيغمبر (2-جي حيصه‌‌)

پئيغمبر هارادادير ؟

لاكين حضرت عيسي پئيغمبرين حاقا چاغيريشي. اينسانلار آراسيندا گؤسترديگي اصلاح ائديجي فعاليتي بير چوخ قارانيتلي شخصلري راحتسيز ائديردي. اونلار بو فعاليتين قارشيسيي آلماقدا قرارلي ايديلر. يهودي روحانيلري ايله روما حؤكمدارلاري‌نين سيلري نتيجه‌سينده عيسي پئيغمبره اؤلوم حؤكمو چيخاريلير. اونو چارميخا چكيب قتله يئتيرمك ايسته‌ييرلر. لاكين الله-تعالينين مصلحتيله عيسي پئيغمبر قئيب عالمينه چكيلير ...

مسئله‌‌يله باغلي خريستيان عالمي بئله حساب ائدير كي، حضرت عيسي چارميخا چكيلير و حاق دونياسينا قوووشور. آمما بير مدت سونرا عيسي يئنيدن ديريله‌رك اؤز ياخينلاري‌نين گؤزونه گؤرونور و موعيين تاپشيريقلار وئرديكدن سونرا قئيبه چكيلير. لاكين ائله اينجيلين اؤزونده عيسي پئيغمبرين چارميخا چكيليب حاق دونياسينا قوووشماسي ائپيزودونون ايختيلافلي مقاملاري وار. عيسي پئيغمبرين چارميخا چكيلمه‌دن الله درگاهينا گئتمه‌سيني 2-جي عصرين دين يازيچيسي واصيليد يازاراق مؤلفي اولدوغو اينجيلده گؤستريب كي، چارميخا چكيلن حضرت عيسي دئييل، باشقا آدام اولوب. بونو عيسي پئيغمبرين معاصرلري اولان بير چوخ كئشيشلر و 2-3-جو عصرلرين بعضي تاريخچيلري ده تسديقله‌ييبلر. بعضي معلوماتلارا اساساً، عيسي پئيغمبري چارميخا چكمك ايسته‌ديكده اونون عوضينده اونو ساتان بير خايني اؤلدوروبلر و بير چوخلاري اؤلن آدامين محض حضرت عيسي اولدوغونو دوشونوب.

قورآن ايسه بو حاقدا بويورور: “...سن ايسرايل اوغوللاري‌نين يانينا آچيق معجزه‌‌لرله گلديگين زامان من (اونلارين بلاسيني) سندن دف ائتميشديم (سني اؤلدورمك ايسته‌ديكده اونلارا مانع اولموشدوم) “ . (سوره 5، آيه 110). “حال‌بوكي اونلار عيسيني نه اؤلدوردولر، نه ده چارميخا چكديلر. اونلاردا يالنيز بئله بير تسووور ياراندي. بو حاقلي ايختيلافدا اولانلار اونون (شخصاً اؤلدورولمه‌سي) باره‌سينده، البته‌‌، شكك-شوبهه ايچريسينده‌ديرلر. اونلارين بونا داير هئچ بير معلوماتي يوخدور. اونلار آنجاق زننه قاپيليريلار. حقيقتده اونو (عيسيني) اؤلدورمه‌ميشديلر. خئير، الله اونو اؤز درگاهينا قالديرميشدير. شوبهه‌سيز، الله يئنيلمز قوووت صاحبي، حيكمت صاحبيدير! كيتاب اهليندن (يهوديلردن و خاچپرستلردن) ائله بير كس اولماز كي، اؤلوموندن اول (جان وئرديگي زامان) اونا (عيسييا) ايمان گتيرمه‌سين، لاكين او، (عيسي) قييامت گونونده اونلارين (كيتاب اهلي‌نين) علئيهينه شهادت وئره‌جكدير”. (سوره 4، آيه 157-159)

باخیش
شنبه 11 شهریور 1391
بؤلوم | حج یازار : نژادمحمد

ارافاتدا مريفته دوغرو

"حج ارفه‌دير." (تيرميزي 5/214، 2975)

زيلهيججه‌نين دوققوزونجو گونو گونش، – او دا سنه شاهيد اولاجاق، – دوغولدوقدان سونرا مريفتين بئشيگي ارافاتين يوللارينا دوشمه‌ليسن. مومكونسه او يوللارا پايي – پييادا دوش. آياغي‌نين ايزي، پئيغمبرلرين آياق ايزينه قاريشسين.

ارافاتا چيخاركن اؤزونو جنّتيني ايتيرميش بير آدم كيمي حيسس ائتمه‌ليسن. اونوتما، دوغولدوغوندا ترتميز ايدين، صاف ايدين. يعني كي، جنّت سن ايدين. اللها وئرديگين سؤزو سونرالار پوزدون. صافليغين ايتدي. كيرلندين. پوزولدون. اؤزونه قارشي يادلاشدين. حقيقته قارشي يادلاشدين. اللها و اشيايا قارشي يادلاشدين.

بو يادلاشما سني اؤزونه قارشي داوالي بيرينه چئويردي. اؤزونله هئچ باريشيق اولا بيلمه‌دين. سنين اوچون گله‌جك ناراحات، كئچميش هوزنلو ايدي. امينليگيني و آزادليغيني ايتيردين.

بونلاري ايتيرن قورخونج بير ديَر ايتكيسينه مروز قالار. اعتراف ائت كي، سن ده ائله اولدون. ديَرلرين آلت-اوست اولدو. آرتيق سنين گؤزونده ديَرسيز اولان قييمتلي اولانلا، آلچاق اولان اوجا اولانلا، كئچيجي اولان قاليجي اولانلا، يالان اولان گئرچك اولانلا يئر ديَيشديردي. دونياني الده ائتمك اوچون آخيرتي وئردين. ائهتيراسينا صادق قالماق اوچون عشقينه خيانت ائتدين. اينستينكتلري‌نين دويومسوز سئلينه قاپيليب اؤزونه پيسليك ائتدين. منليگيني راضي ائتمك اوچون اللهي نارازي ائتدين.

بوتون بونلاردان سونرا بير ويرانه كيمي گليب داياندين ارافات تپه‌لري‌نين/مريفت تپه‌لري‌نين اتكلرينده.

الله دا سندن محض بونو گؤزله‌ييردي. گوناه ايشله‌مه‌مه‌ييني دئييل، تؤوبه ائتمه‌ني گؤزله‌ييردي. موكممللشمه‌ييني دئييل، كاميل اولماماغيني اعتراف ائتمه‌ييني گؤزله‌ييردي. اوميد كسمه‌ييني دئييل، آستاناسينا باش قويوب ياش تؤكمه‌ييني گؤزله‌ييردي.

سؤزون مغزي، ملكلشمه‌ييني دئييل، "اينسان" اولماغيني گؤزله‌ييردي.

هر شئيدن ده باشقا اؤز اؤزونله، يادلاشديغين حقيقتله يئنيدن تانيش اولماغيني، فطرتينله، ويجدانينلا تكرار گؤروشمه‌ييني گؤزله‌ييردي.

چونكي، بورا ارافاتدير. ارافات، تانيماق معناسيني وئرن "مريفت" مصدريندن تؤره‌ديلميش بير آددير. بيلديگين و ايستيفاده ائتديگين عاريف، مريفت، ايرفان، مشهور عيني معناني وئرن سؤزلردير. مريفت، بيلمكدن اوستون بير شئيدير. هر مريفت بيلميي ده ائهتيوا ائدير. مريفت بير شئيين اؤزونو تانيماق، سيررينه چاتماق، اصلينه واقيف اولماقدير. اشياني و وارليغي اولدوغو كيمي قاورايا بيلمكدير... محض بودور مريفت. عالملره رحمت حضرتي محمّد، اونا گؤره تئز-تئز بئله دعا ائدردي:

ايلاهي! ارينعل-اشياه كاهي!

["اللهيم! منه اشياني اولدوغو كيمي، اؤز حقيقتي ايله گؤستر!"]

محض بو آندا اوزرينده اولدوغون ارافات، مريفت يئريدير. آدم، اؤز حقيقتيني، عاجيزليگيني، باجاريقسيزليغيني، هدلريني اورادا تانيدي. آدم، ارافاتدا آدام اولدو.

سن ده آدموغلوسان و اؤزونله تانيش اولماغا گلدين. حيكمتين ان اسكيلمز دوستورودور: اؤزونو تانييان رببيني تانييار. اگر اؤزونو تانيسان، رببيني ده تانيياجاقسان. ساده‌جه رببيني دئييل اشياني، اينساني، دوستو، دوشمني، اوجاني، آلچاغي، قاليجيني، كئچيجيني تانيياجاقسان.

اؤزونله تانيش – بيليش اولمادان نه ائده بيلرسن كي؟

سرحدلريني، ايمكانيني، ايمكانسيزليغيني يعني هدديني و حدودونو بيلمه‌دن ائده‌جه‌يين هر ايشي يوزونه، گؤزونه بولاشديرماغين قاچينيلمازدير.

تانيش اولدوم دئديكلريندن ايللر سونرا خيانت گؤردويونو، اورگي‌نين قبيريستانليغا دؤندويونو، ان آغير آجيلاري ان ياخي‌نيندا اولانلاردان چكديگيني سؤيله‌ييرسنسه، دئمه‌لي سنين تانيماق و تانيش اولماقلا علاقه دار جدي بير پروبلئمين وار. باخ اصل فورصتدير. ايندي "تانيماقلا" تانيش اولا بيلرسن. چونكي بو تورپاقلار، اوزرينده دايانان عاريفه، مدنيتي اؤيره‌دن مريفت ديياري ارافاتدير.

ارافات يالنيز تانيش اولما يئري دئييل، عيني زاماندا هم ده گؤروشمه يئريدير: هووانيزلا، هووالارينيزلا. هووا يالنيز بير حيات يولداشي دئييل بير جان يولداشي، بير يول يولداشي، بير داوا قارداشي، بير اورك دوستودور. ايتيرديگينيز نه قدر اورگي، – باشدا اؤز اورگينيز اولماقلا، – ارافاتدا تاپارسينيز. هووا سيزي احاطه‌‌ ائدن دوستلارينيز، موحيطينيزدير. موحيط؛ يعني هم جهنمينيز، هم جنّتينيز.

‘وقفه‌يه دايانماق'

وقفه اونسوز دا "دوروش" دئمكدير. بو حالدا "وقفه‌يه دايانماق" ايفاده‌سي سهو دئييلمي؟ خئير، دئييل. عكسينه وقفه‌يه دايانماق ايفاده‌سي حادثه‌‌نين اؤزونه دقت چكن چوخ معنالي بير ايفاده‌دير.

چونكي، وقفه‌يه دايانماق، "دوروش باره‌سينده دوشونمك"، "دوروش باره‌سينده تفككور ائتمك" دئمكدير. دوروش، يعني سيزين فرد اولاراق دوروشونوز، هارادا دوردوغونوز، نَيه قارشي دوردوغونوز، نَيين و كيمين يانيندا دوردوغونوز، نئجه دوردوغونوز، نه اوچون دوردوغونوز؟

وقفه هر كسين اؤز دوروشونا نظارت ائتمه‌سيدير. اول فردي و شخصي دوروشونا. اينسان اؤزونه قارشي هارادا دايانيب؟ اورگي‌نين يانيندامي، حيسسلري‌نين يانيندامي؟ عاغيلي‌نين يانيندامي، اينستينكتلري‌نين يانيندامي؟ ايماني‌نين يانيندامي، شيطانين يانيندامي؟ فطرتي‌نين ياخي‌نيندامي، اوزاغيندامي؟

داها دوغروسو حقيقتن بير يئرده دايانيرمي؟ يوخسا باشي بوش بوراخيلميش، ايستيقامتيني ايتيرميش، سوكاني قيريلميش، فيرتينايا دوشموش بير گمي كيمي، اورادان اورايا چيرپيليب پارچالانماغيمي گؤزله‌يير؟

بير يئرده دايانيرسا، نه اوچون اورادا دايانير؟ دايانديغي يئري اؤزومو سئچيب، يوخسا كيملرسه تلقين ائديب؟ تصادفنمي اورادا دايانيب، شعورلو اولاراقمي؟ يعني، دايانديغي يئره بلدديرمي؟

بير ده اينسانين اجتماعي دوروشو وار: باشقالارينا قارشي دوروشو نئجه‌دير؟ يولداشينا، دوستونا، عائله‌‌سينه، جمعيتينه قارشي هارادا يئر آليب؟ اجتماعي و سيياسي حادثه‌‌لرده هارادا، كيملره قارشي، كيملرين يانيندا دايانير؟

مثلا ايبراهيمله بيرليكده بوته و بوتچولره قارشي دايانيب، يا ايبراهيمه قارشي بوتچولرين يانيندامي؟ قورآنداكي ايفاده‌سييله شيطانا قارشي "اللهين هيزبييله"مي دايانيب، يا اللها قارشي "شيطانين هيزبييله"مي؟ ظالملارين و تاغوتلارين صافيندا دايانيب، يوخسا مظلوملارين و ازيلنلرين صافيندا؟

ارافاتداكي بو دوروش ايكي يئرده بير ده تكرارلاناجاق. بيري مشاريلهارامين اولدوغو موزده‌ليفه‌ده، ديگري مينادا. موزده‌ليفه‌دكي دوروش، كبه‌نين اتكلرينده اللهين حضورونا چاتماميشدان اولكي ايكينجي تميزلنمه مكانيدير. مينا ايسه شيطاني اينستينكتلرله حسابلاشيب، اللهين حضورونا موقاويله يئنيله‌مك اوچون ترتميز، باغلانتيسيز، قئيد – شرطسيز چاتماق اوچون سون تميزلنمه يئريدير. ارافاتدا اؤزونوزله تانيش اولدونوز، مريفته يوكسه‌ليب هددينيزين عاريفي اولدونوزسا، ايندي ائديله‌جك يئگانه شئي قاليب: دعا...

دعا...

باخیش
چهارشنبه 11 مرداد 1391
بؤلوم | اوروج یازار : نژادمحمد

رامازانيميز هدر گئتمه‌سين

بيريميز حكيمه گئتسك، موعيين خسته‌ليكدن و يا آغريدان شيكايت ائتسك، چوخ گومان كي، حكيم اول بيزي موايينه ائديب، سونرا دياقنوز قوياجاق. تام اولاراق خسته‌ليگيميزين سببيني آيدينلاشديرماق ايسته‌يه‌جك. اوندان سونرا ايسه موناسيب بيلديگي درماني و موعاليجه‌‌ اصولونو يازاجاق. طبيعي كي، يازديغي درمانلارين دا قبولئديلمه اوسلوبونو باشا سالماغي اونوتماياجاق. مثلا، بو درماني يئمكدن سونرا، بو درماني يئمكدن ياريم ساعت اول، بو درماني گونده 3 دفعه‌‌، بو درماني گونده بير دفعه‌‌، فيلان درماني ياتماميشدان اؤنجه و س. درمانلاري موطلق توصيه‌‌ ائتديگي فورمادا و واختدا دقيقليكله قبول ائتميي برك-برك تاپشيرديقدان نئچه گون سونرا اونا تكرار مراجعت ائتمه‌ييميزي گؤزله‌يه‌جك.

وصف اولونموش موعاليجه‌‌ مدتي بيتر-بيتمز خسته حكيمين يانينا گلركن سيزجه، حكيمين ايلك سوالي نه اولا بيلر؟! يقين كي، “ايندي نئجه‌سن، ياخشيلاشميسانمي؟ ياخشي اولوبمو سههتين؟ ديَيشيليبمي؟” – اولاجاقدير. آردينجا دا درمانلاري تام دقيق يازديغي فورمادا و واختلاردا قبول ائديب-ائتمه‌ديگيني بير داها دقيقلشديره‌جكدير. البته‌‌ ايلك سوال خسته‌نين ياخشيلاشماسي و ساغالماسي حاقيندا اولماليدير. چونكي ائله اساس هدف ده بودور، درمانلار ايسه هدفه و مقصده چاتماق اوچون ساده‌جه بير واسطه‌‌دير.

بو جور آدي و ساده بير پروسئدوردا هئچ كيم موباهيسه و ايختيلاف ائتمسه ده چوخ تأسف كي، عبادتلره گلديكده ايش تاماميله باشقا مجرايا يؤنه‌لير و بو مسئله‌‌ده هئچ بير اتفاقا گله بيلميريك. او عبادتلر كي، بيزيم داخيليميزي، اخلاقيميزي و معنوياتيميزي ياخشيلاشديرماق و دوروستلشديرمك اوچوندور.

قايميز، ياراديليشيميزين سببي، مقصدي...

الله-تعالي بيزي ياراديب يئر اوزونده يئرلشديريب كي، بؤيوك بير مسئوليتي حياتا كئچيرك، معبودوموز اولانا اطاعت ائدك، تام اولاراق اونا تسليم اولاق، اونون امرلرينه تابع اولاق، يالنيز اوندان ايسته‌يك، يالنيز اونا گوونك، توككول ائدك، يالنيز و صرف اونون ريزاسي اوچون ايش گؤرك، اونو سئوك، اونو اوستون توتاق، اونو راضي سالاق، بير سؤزله عبادتله مشغول اولاق. بونلارين اولماسي دا قلبيميزين ديري قالماسي، قلبيميزين حياتي و اونون دونيا سئوگيسيندن، نفسين تضييقيندن قورتولماسي اوچوندور.

قلبيميزين حياتي و ديري قالماسي، معبودونا تام تابع اولا بيلمه‌سي اوچون ده الله-تعالي بيزلري دوغرو واسطه‌‌لره يؤنلنديرميشدير. الله-تعالي قورآني-كريمده بيزه امر ائده‌رك بويورور كي؛ “ائي اينسانلار! سيزي و سيزدن اولكيلري ياراتميش رببينيزه عبادت ائدين كي، موتتقي اولاسينيز! (اللهدان قورخوب پيس عمللردن چكينه‌سينيز!)” (ال-بقره، 21). پيس عمللردن چكينه‌رك، تماميله رببيميزين امرلرينه تابع اولماق اوچون عبادت ائتمه‌لي‌ييك. موختليف جور عبادتلر نَيه گركدير، نه ديَرلري وار؟!

ناماز - “حقيقتن، ناماز (اينساني) چيركين و پيس عمللردن چكينديرر.” (ال-عنكبوت، 45)

زكات، صدقه‌‌ - “اونلارين ماللاريندان صدقه‌‌ (زكات) آل. بونونلا اونلاري تميزله‌ميش، پاك ائتميش (ماللارينا بركت وئرميش، عمللري‌نين ثاوابيني آرتيرميش) اولارسان.” (ات-تؤوبه، 103)

ذكر – “بيلين كي، قلبلر آنجاق اللهي ذكر ائتمكله راحتليق تاپير.” (ار-راد، 28)

اوروج – “ائي ايمان گتيرنلر! سيزدن اولكيلره واجيب ائديلديگي كيمي، سيزه ده اوروج توتماق واجيب ائديلدي كي، بلكه (پيس عمللردن) چكينه‌سينيز.” (ال-بقره، 183)

هر نه جور عبادت اولور-اولسون، اونا بيزي الله يؤنلنديريبسه، او بيزه بويوروبسا، او عبادت نؤع بير واسطه‌‌دير، هانسي كي، بيزي اؤنه آپاراجاق، اللها طرف چكجك و اونا ياخينلاشديراجاق. بونونلا دا بيز ياراديليشيميزين هدفينده دوران قايه‌ني حياتا كئچيرميش اولاريق. ائتديگيميز عبادتلرين هر بير حركتي بئله اللها ياخينلاشماق اوچون بير واسطه‌‌دير. “سجده ائت و (اللها) ياخينلاش!” (ال-علق، 19).

اللها سانكي اونو گؤرورسنميش كيمي عبادت ائت!

بس بو جور ائده بيلمه‌ديكده نه اولور كي؟! عبادتين اؤزيي ايتير. عبادته بو جور ياخينلاشماديقدا عبادتين يالنيز شكلي قالير، هدف او اولور كي، نه جور اولور-اولسون بو عبادت يئرينه يئتيريلسين، ادا اولونسون. عبادتين اساس مئيوه‌سي و مقصدي ايسه قئيبه چكيلير، تأثيري گؤرسنمير. اوندا بنده هئچ اللها ياخينلاشا دا بيلمير، اونا دوغرو گئدن يولدا ياريشانلارين سيراسيندا بئله يئر توتمور. نه ايمانيندان حزز آلا، نه عبادتي‌نين شيرينليگيني حيسس ائده بيلير، نه ده اؤز خاصيت و اخلاقيندا ديَيشيكليك موشاهيده اولونور. بو جور حاللار بضا ائله تهلوكه‌‌لي اولور كي، قارشينداكي اينسانين ايكيلي شخصيتيني آنلاماقدا چتينليك چكيرسن. بير ده گؤرورسن كي، چوخ ناماز قيلان، هميشه مسجيده گئديب-گلن، اوروج توتان، حجه گئدن اينسان امانته خيانت ائدير. دونيا مالينا و لذتينه ائله باغلي اولور كي، اينسانلارلا پيس رفتار ائدير، يالان دانيشير و هامييا حسد آپارير. شخصيتي‌نين بو جور منفي علامتلري نَيه دلالتدير؟! ائتديگي عبادتلرين اونا بير فايداسي اولوبمو، هئچ ايماني ساغلامديرمي، دوغرو و دوروست بير نتيجه، يا تأثير ائديبمي اونون قلبينه؟! بئله يئرده پئيغمبرين (س.آ.س) سؤزونو خاتيرلاماماق مومكون دئييل؛ “اوروج توتان وار كي، توتدوغو اوروجدان اونا چاتان آج-سوسوز قالماغيدير، ائله ناماز قيلان وار كي، اونا اداسيندان چاتان يالنيز يورغونلوق و اذيتيدير.”

عبادتيميزين نه اؤزو، نه ادا فورماسي، نه شكلي نه ده ائتديگيميز خئيير عمللرين ماتئرياللاري الله اوچون ماراقليدير؟! “اونلارين نه اتي، نه ده قاني، اللها چاتماز. اونا يالنيز سيزين تقوانيز چاتار.” (ال-حج، 37)

ابن عباس دئميشدير كي؛ “تفككورله قيلينان 2 روكت قناعتجيل ناماز، بوتون گئجه‌ني تفككورسوز قييامدا كئچيرمكدن خئييرليدير.”

اللها ياخينلاشماق قلبلرله مومكوندور!

باخاق بيز موسلمانلارين اينديكي حالينا، حال-حاضركي وضعيتينه!

عبادتلرين بير تأثيري حيسس اولونورمو؟!

عبادت ائدنلرين سايينا باخاق، گوندن-گونه چوخالير، دين-ايمانا گليرلر. لاكين اوروج توتان، صدقه‌‌ وئرن، حجه گئدنلرين سايي آرتسا دا، نتيجه‌سيني گؤره بيلميريك. ناماز قيلان بير بنده اوچون، اؤز منفتيني الدن وئرمه‌مه‌سي نامينه يالان دانيشماق نئجه ده اوجوزلاشيب. هر گون قورآن اوخويان، قورآن ازبرله‌ين، قورآن علميني آلان آداما باخيرسان، اخلاقيندا ذره‌‌ قدر ده قورآنين ديقته ائتديگي اخلاق و رفتاردان بير شئي گؤرسنمير.

قورآن اوخوماق، اونو تيلاوت ائتمك عظمتلي بير عبادتدير. بو عبادت قلبلره حيات بخش ائدير، نورلانديرير، شفا وئرير، ساغالدير. اينديكي گونوموزده ايسه قورآن آراشديريلمادان، درك ائديلمه‌دن، معناسينا گيريشمه‌دن ساده‌جه ديلله تلفّوظ اولونان سؤزلره چئوريلميشدير. قايميز او اولوب كي، فاتيحه‌‌دن خطمه قدر ان قيسا زاماندا تيلاوتي نئجه بيتيرك. چوخلاري دا بونو ائتمه‌نين سببي اولاراق پئيغمبريميزدن (س.آ.س) بو حديثي سيتات گتيريرلر؛ “كيم اللهين كيتابيندان بير حرف اوخويارسا، اونا 10 حسنت (ثاواب) يازيلار...”

بس الله-تعالينين بيزه بويوردوغو؟! “(بو) موبارك كيتابي، (اينسانلارين) اونون آيه‌لريني دوشونوب آنلاماسي و عاغيل صاحبلري‌نين ده اوندان عيبرت گؤتورمه‌سي اوچون سنه نازيل ائتديك.” (ساد، 29)

“مگر اونلار قورآن حاقيندا دوشونمورلرمي؟ يوخسا قلبلري قيفيلليدير؟” (محمّد، 24)

ابن هاببان روايت ائدير كي، بير گون رسول الله (س.آ.س) گؤرور كي، بير دسته سهابه قورآن اوخويور، اونلارا مراجعت ائديب بئله دئيير؛ “اللها حمد اولسون كي، اونون بير تك كيتابي وار. سيزلرين آراسيندا خئيرخاهلارينيز وار، سيزلردن قارادريلي و قيرميزي دريلر ده وار، قورآني اوخويون! اوخويون، چونكي قوملر گله‌جك كي، اونو (قورآني) اوخوياجاقلار، حرفلريني اوخدا ياي توتان كيمي دقيق توتاجاقلار آمما بوغازلاريندان آشاغي كئچمه‌يه‌جك، (قورآنين تيلاوت) ثاوابينا تلسه‌جكلر آمما اونو (قورآني) تمكينله اوخوماياجاقلار.”

پئيغمبريميزدن (س.آ.س) روايت اولونان حديثلرين بيرينده ده بئله بويورولموشدور؛ “سيزدن بيرينيز گئجه‌نين بير حيصه‌‌سينده اويانيب، باشا دوشمه‌ديگي ديلده قورآني اوخويار و نه دئديگيني آنلامازسا، ياخشيسي بودور كي، گئتسين ياتسين.” (ساهيه ال-جامي اس-ساغير 717)

ابن هيبباندان باشقا بير حديث ده روايت اولونور كي؛ "آلي عمران سوره‌سي‌نين بو آيه‌سي نازيل اولاندا “گؤيلرين و يئرين ياراديليشيندا، گئجه و گوندوزون ايختيلافيندا عاغيل صاحبلري اوچون آيه‌لر (ايشاره‌لر و معجزه‌‌لر) واردير.” رسول الله (س.آ.س) بئله دئدي كي، واي اولسون بو آيه‌لري اوخويوب تفككور ائتمه‌يه‌نين حالينا!"

عبدالله ابن مسعود دئميشدير كي؛ قورآني شعر كيمي اوخومايين...

الي بين ابو طالب بويوروب كي؛ بير اوخونوشدا كي دوشونمه يوخدور، اوندا خئيير ده يوخدور!

بو، او دئمك دئييل كي، قورآني-كريمين تيلاوتيني آزالتماق لازيمدير، اساس مسئله‌‌ عبادتين گؤزل و تام شكيلده يئرينه يئتيريلمه‌سيدير. اوركدن و قلبدن گلمه‌ين، اوركده يئر توتمايان، اوره يه تأثير ائتمه‌ين، خئيره دوغرو ديَيشديرمه‌ين عبادتين نه معناسي وار كي؟!

قلب حيسس ائتمه‌ليدير...

عبادتلر قلبين ديري قالماسي اوچون موختليف واسطه‌‌لردير. تميز، دوغرو، دوزگون، دوروست، گؤزل و ساغلام عبادت اوره يه حيات و حيات دولوسو راحتليق بخش ائده بيلر. بونون خاريجينده اولان عبادت ايسه شكيل، فورما، ريتوال و يا عادت كيمي قالير. چوخ گومان كي، بئله عبادت ائده‌نين ده داخيلي دئييل، خاريجي گؤرونوشو فرقله‌نير.

ناماز قيلاركن ان اؤنملي اولان قلبين حيسس ائتمه‌سي، قارشيسيندا دورولانين عظمتيني درك ائده‌رك تيتره‌مه‌سي، اوخونولان آيه‌لري تفككور ائتمه‌سي، روكو و سجده‌لرده تمكينلي اولماسي و تام اؤزونو نامازا حصر ائتمه‌سيدير.

همچي‌نين ذكر ائتمك ده، اللهي آنماق، گوناه و تقسيرلري خاتيرلاياراق خجالت و پئشمانچيليق چكمك، باغيشلانما ديله‌مك، مغفيرته احتياج دويماق، مرحمت ايسته‌مك، اونون عظمتيني و شنيني تعريف ائتمك و قلبي بو ذكرلرده اريتمكدير.

بونا اويغونلاشديراراق اوروج، صدقه‌‌، يارديم ائتمك، ايفتار وئرمك و سايره كيمي بوتون خئيير عمللري بو جور ائتمك گركدير.

رامازان آيي..!

بو فورصتدن لاييقينجه ايستيفاده ائدك!

الله بيزي شكيل و فورمادان باشقا هئچ بير شئي ديَيشمه‌ين عبادتلردن قوروسون!

عبادتلر اخلاقيميزي، نفسلريميزي، فيكير و دوشونجه‌لريميزي، حاليميزي و وضعيتيميز، عمل و رفتارلاريميزي موسبته دوغرو ديَيشديرسين!

الله بيزه ائله بير عبادت نصيب ائتسين كي، اونون حقيقي حيكمت و مقصدلرينه نايل اولا بيلك!

آمين!

باخیش
دوشنبه 19 تیر 1391
بؤلوم | پئيغمبرلر یازار : نژادمحمد

حضرتي ياقوب

حضرتي ياقوبون سوي-كؤكو حضرتي ايسهاق واسطه‌‌سي ايله حضرتي ايبراهيمه دايانير. اونون ان مشهور لقبي ايسرايلدير. قارداشي آيسدان قاچاراق [اونون ظلموندن] داييسي‌نين يانينا گئدركن گوندوزلري گيزلنميش، گئجه‌لر ايسه يول گئتميشدير. بونا گؤره ده اونا ايسرايل لقبي وئريلميشدير. ايسرايل كلمه‌سي‌نين معناسي گئجه [اللها] گئدن دئمكدير. [ات-تابري، تاريخ، مصر، 1326، بير ، 162]

حضرتي ياقوبون دوغولاجاغي و پئيغمبرليگي اولجه‌دن موژده‌لنميشدير. آيه‌لرين مئالينا باخاق: “...بيز او قادينا [ايبراهيمين زؤوجه‌سينه] ايسهاقي موژدله‌ديك؛ اوسته‌ليك ايسهاقين آردينجا دا [اونون اوغلو] ياقوبو [موژدله‌ديك]. [هود، 71]

قورآني-كريمين بير چوخ آيه‌سينده حضرتي ياقوبون پئيغمبرليگيندن و فضيلتلريندن بحث ائديلير. آيه‌لرين مئاللارينا باخاق:

“ان سونوندا اونلاردان و اونلارين اللهي بوراخاراق تاپينديقلاريندان اوزاقلاشينجا، بيز اونا ايسهاقي و ياقوبو ارمغان ائتديك و اونلارين هر بيرينه ده پئيغمبرليك وئرديك؛ داها آرتيغي اونلارا رحمتيميزي بخش ائتديك؛ نهايت اونلاري دوغرولوغون و حقيقتين تمسيلچيسي ائتديك.” [مريم، 49-50]

“نوحا وحي ائتديگيميز كيمي سنه ده وحي ائتديك. ايبراهيمه، ايسماييلا، ايسهاقا، ياقوبا، نوه‌لرينه، عيسييا، ائييوبا، يونوسا، هارونا، سولئيمانا دا وحي ائتميش و داوودا دا زبورو وئرميشديك.” [ان-نيسا، 163]

“قوووتلي و بصيرتلي قوللاريميز ايبراهيمي، ايسهاقي و ياقوبو دا ذكر ائت. اونلار گوجلو بير شخصيت و ايدراك صاحبي ايديلر. بيز اونلارين شخصيتلريني [ابدي يوردو] اونوتماسينلار دئيه صافلاشديرديق.” [ساد، 45-46] و س.

بوندان باشقا حضرتي ياقوبون بير اؤزلليگي ده وار ايدي كي، بو دا اونون يوخو يوزماق قابيليتي ايدي. بيز بونو دا قورآندان اؤيره‌نيريك. “بير زامان يوسوف آتاسينا دئميشدير: “آتاجان! من [يوخودا] اون بير اولدوز، گونشي و آيي گؤردوم. “گؤردوم كي، اونلار هاميسي منه سجده [تزيم] ائديرلر” دئميشدي. [آتاسي ياقوب دا اونا بئله] دئميشدي: اؤولاديم! يوخونو قارداشلارينا سؤيله‌مه، يوخسا اونلار سنه بير حيله‌‌ قورارلار. چونكي شيطان، اينسانلارين آچيق-آشكار دوشمنيدير...” [يوسوف، 4-5]

حضرتي ياقوب حاقيندا اولان آيه‌لرين هاميسيني بورادا ذكر ائتمك نيتينده دئييليك. هم ده حضرتي يوسوف قيسسه‌سينده بو مؤوضويا بير داها مراجعت ائده‌جييك. اونا گؤره ده حضرتي ياقوبلا باغلي ان واجيب حساب ائتديگيميز عامللري آرديجيلليقلا آراشديرماغا چاليشاق:

وصيييتي

“موسلمان اولاراق جان وئرين!”

بو ساده‌جه بير آتانين دئييل، ائله‌جه ده بير پئيغمبرين وصييتيدير. اوندان سونرا گلنلرين حاق دينه اويمالاريني و صالحلردن اولمالاريني اونلارا وصييت ائتميشدير. “بونو ايبراهيم، اوغوللارينا وصييت ائتدي، ياقوب دا: “اؤولادلاريم، شوبهه‌سيز الله سيزلره بو ديني سئچدي، سيز ده آنجاق موسلمان اولاراق جان وئرين!”- دئدي." [بققره، 132]

موسلمان اولاراق جان وئرمك، اللهدان قورخان اينسانلارين ان اؤنملي دعالاريندان بيريدير. چونكي بير اينسان حياتي بويونجا صالح عمللر ايشله‌ديگي حالدا سونرادان نيتيني پوزوب ايمانيندان دؤنسه ائتديگي بوتون عمللري بوشا گئده‌جك، جهنم عذابينا لاييق اولاجاق بير مؤوقئيه دوشه‌جكدير. حضرتي ياقوب اوغوللارينا "موسلمان اولاراق جان وئرين" دئيركن اونلاري بو باره‌ده خبردار ائدير، اونلارا صميمي نيتلريني و ايمانلاريني قورومالاريني وصييت ائدير. آتالاري‌نين وصييتينه عمل ائده‌جكلرينه سؤز وئرن اوغوللاري دا: “سنين و آتالارين ايبراهيم، ايسماييل، ايسهاقين دا ايلاهي اولان يئگانه ايلاها قوللوق ائده‌جييك و يالنيز اونا تسليم اولاجاغيق...” [بقره، 133] موسلمان اولاراق جان وئرمك اللها قئيدسيز-شرطسيز تسليم اولماقدير: ايبراهيم كيمي، ايسماييل كيمي... بونا سؤز وئرنلر سؤزلري‌نين نه معنايا گلديگيني چوخ ياخشي درك ائديرديلر. آتالارينا بو سؤزو وئرركن چوخ ياخشي بيليرديلر كي، اصلينده بو سؤزو اللها وئريرلر... اونا گؤره ده دئديكلري‌نين فرقينده اولدوقلاريني بير ده ديله گتيريرلر: “سنين و آتالارين ايبراهيم، ايسماييل، ايسهاقين دا...” اونلارين تسليميتلريني نئجه ثبوت ائتديكلريني ده بيليرديلر. قورآن بونو بيزه خبر وئرمكله سانكي بير مئساژ وئرير: “سن ده “موسلمانام” دئيركن، نه دئديگي‌نين فرقينده‌سنمي؟” “موسلمانام” دئمك، “تسليمم!” دئمكدير”، “تسليم اولماق ايسه يالنيز ايبراهيمين، ايسماييلين... ائتديگيني ائده بيلمكدير.” “من موسلمانام” دئمه‌ميشدن اؤنجه بير داها دوشونك. حقيقتن ده عالملرين رببينه تسليم اولدوقمو؟!

ياقوبون توككولو و سئوگيسي

حضرتي ياقوب بير ده بيزه توككولو اؤيره‌دير. و دئدي كي: “اؤولادلاريم، [شهره] هامينيز عيني قاپيدان گيرمه‌يين، آيري-آيري قاپيلاردان گيرين! من اللهدان گله‌جك هئچ بير شئيي سيزدن اوزاقلاشديرا بيلمه‌رم؛ چونكي حؤكم يالنيز اللها عايددير. من اونا توككول ائتديم. توككول ائدنلر ده يالنيز اونا توككول ائتمه‌ليديرلر!” [يوسوف، 67]

ياقوب اوغلانلارينا شهره گيرركن تدبيرلي اولمالاريني تؤوسيه ائدركن چوخ اهميتلي بير حقيقتي ده خاتيرلادير: تدبيره دئييل، اللها گوونمه‌ليسينيز. چونكي الله ايسته‌مه‌ديكچه هئچ كيم هئچ كيمه نه زيان وئره بيلمز، نه ده كي، خئيير. مؤمين اللهين ريزاسيني قازانماق اوچون باجارديغي هر شئيي ائدر، تدبيريني گؤرر. لاكين نتيجه‌نين يالنيز اللهين ايزني ايله اولدوغونو دا يقينليكله بيلر. يالنيز اونا گوونر. نتيجه اونون آرزولاماديغي كيمي اولسا بئله بوردا اللهين بير حيكمتي‌نين اولدوغونو بيلر و بو نتيجه‌يه عصيان ائتمز. مؤمين بيلير كي: “خئيير بيلديگينده زيان، زيان بيلديگينده خئيير وار. دوغروسونو او بيلمز، الله بيلر.” اونا گؤره ده او، اؤز بوينونا دوشه‌ني لاييقينجه ائتمه‌يه چاليشار. نتيجه‌نين نه اولماسيندان آسيلي اولماياراق هئچ بير زامان اللهين يولونو ترك ائتمز، ياساقلارينا ياخينلاشماز. “بونو سنين ريزان اوچون ائتميشديم، نييه بئله اولدو؟” دئيه عصيان ائتمز. بو نتيجه‌نين حيكمتيني آنلايانا قدر صبر ائدر.

حضرتي ياقوبون 12 اوغلو اولدوغونو قورآن بيزه سؤيله‌يير. يوسوف اونلاردان بيريدير. هله كيچيك ياشدا ايكن الله اونا يوخودا اون بير اولدوزون [قارداشلاري‌نين]، گونشين و آيين [آتا و آناسي‌نين] سجده ائده‌جه‌ييني خبر وئرميشدي. [يوسوف، 5] ياقوبون بو قدر اؤولادي‌نين ايچينده يوسوفو سئچمه‌سي‌نين، اونون اوچون گؤزلري كور اولونجايا قدر آغلاماسي‌نين سببي بو يوخونون داشيديغي مئساژ اولا بيلرديمي؟

ياقوبون يوسوفا اولان سئوگيسي فرقلي بير سئوگي ايدي. بير آتانين اؤولادينا دويدوغو سئوگيدن چوخ، بير پئيغمبرين قئيرت سيموولو اولان باشقا بير پئيغمبره دويدوغو بير سئوگي ايدي. يوسوفون گؤردويو بو يوخو ياقوبا “اللهين ياقوب سويونا اولان نعمتيني يوسوف اوزريندن تاماملاياجاغي” مئساژي ايدي. [يوسوف، 6] ياقوبو كور ائدن يوسوفون يوخلوغو دئييلدي، اؤولادلاري‌نين خيانتي ايدي. او يوسوفون يوخوسو ايله بير مئساژ آلميش و يوسوفا دا بو يوخونو قارداشلارينا دانيشماغي ياساقلاميشدي... سانكي بير آز تدبيرينه گوونميشدي...

اوغلانلاري يوسيفه قارشي ائده‌جكلري خيانتي پلانلاشديراندا دا ياقوب اؤزونه‌مخصوص “تدبير” گؤرموشدو. يعني، يوسوفو قوروياجاقلارينا داير اونلاردان بير سؤز آلميشدي. بوردا دا بيز اونون “تدبيرلي داورانديغيني” گؤروروك. آمما هله توككولونون شاهيدي اولموروق. الله اونا،- اونون شخصينده ده بيزه،- توككولو اؤيره‌دير. تدبير آلا بيلرسن، آمما تدبيرلرين ان گؤزه‌لي توككولدور. عاليملردن بيري دئييب كي، "تدبيرينيزه گوونمه‌يين، اللها گووه‌نين. تدبيرينيزه گوونرسينيزسه، تدبيرينيزي رببينيز ائدرسينيز".

ياقوب توككول ايمتاهانيني وئرمه‌يه يوسوفلا باشلادي. بيزه ده بير مئساژ وئردي: “يوسوفونو” ايتيرمزدن اول توككول ائده‌جكسن. عكس حالدا يوسوفدان سونرا "بونيامينله" ايمتاهانا چكيله‌رك توككول ائتميي اؤيرنه‌جكسن. بونيامين ياقوبون بيتديم نقطه‌‌سي ايدي. بونيامين ياقوبون توككول اؤنجه‌سي ايمتاهاني ايدي. ياقوب يوسوفونو ايتيرمكله توككول درسيني ياخشي اؤيرنميش، تدبيري‌نين يانيندا توككولونو ده ديله گتيرميش، اللهين بؤيوكلويونو و حيكمت صاحبي اولدوغونو وورغولاميشدير. الله دا قولونون بو ايمتاهاني وئرمه‌يه حاضر اولدوغونو گؤرموش، توككول ايمتاهانيندان لاييقي ايله چيخان ياقوبا يوسوفين موژده‌سيني وئرميشدير.

بو مؤمينين ايماني ايله آغلي آراسيندا تارازليغي نئجه قوروماسي‌نين گؤزل بير اؤرنييدير. بونياميني اؤزلري ايله آپارماق ايسته‌ين اوغلانلارينا “سيزلره امانت ائتمه‌رم، اللها امانت ائديرم” دئيير و توككولونون يالنيز اللها اولدوغونو بَيان ائدير.

ياقوب يوسوفو گؤزلري‌نين ايتيره‌جك قدر سئويردي. آمما اللهين تقديرينه ده صبر ائديردي. “آرتيق منه دوشن گؤزل بير صبردير” [يوسوف، 18] دئدي. اونو يوسوفوندان بير مدتلييه اوزاقلاشديران الله اونا دوغرو سئوميي ده اؤيره‌ديردي. يوسوفسوزلوغا او قدر آليشدي كي، اونا خيانت ائدن اوغوللاريني باغيشلادي. اونلاري دا ايتيرمك ايستميردي. اونلارين خيانتينه ياقوبون يوسوفا اولان سئوگيسي سبب اولموشدو. آتالاريني قيسقانميشديلار يوسوفا. ياقوب سئوگيني اوغلانلاري آراسيندا بلكه ده دوغرو پايلاماميشدي كي، اونلاردا قارداشلارينا قارشي قيسقانجليق يارانميشدي. شيطانين اينسانين دوشمني اولدوغونو بيليردي، اونا گؤره يوخونو قارداشلارينا دانيشما كي، قيسقانماسينلار دئييردي. اونلارين قيسقانماسيني گؤرن شيطان دا اونلارا وسوسه وئرمه‌سين. [يوسوف، 5] يوسوفون بير قورد طرفيندن يئييلديگيني سؤيله‌ين اوغلانلارينا دا “سيزي نفسينيز آلداديب” دئيير. بونو قيسقانجليقدان ائتديكلريني بيلديگيني دولاييسي ايله سؤيله‌يير. اونا گؤره ده سانكي بير آز دا اؤزونو قينايير. عصيان ائتمه‌دن، اللهين حيكمتيني آنلايانا قدر صبر ائدير. طبيعي كي، سونوندا اوغلانلاري دا سهولريني آنلاييرلار كي، يوسوفا تزيم ائدير، عذر ايسته‌ييرلر. او دا اونلاري باغيشلايير [بو باره‌ده يوسوف بؤلومونده داها گئنيش دانيشاجاغيق].

دوغرودور، يوسوف ياقوب اوچون ساده‌جه بير اؤولاد دئييلدي... او يوسوفو ايتيرمكله گؤزلريني ده ايتيردي. آمما عوضينده مصردن كنان ائللرينه گلن قوخونو [يوسوفون اتريني] دويان بير بورون قازاندي. بو اتري دويماق اوچون ياقوب اولماق لازيم ايدي، بونو آنلاماق اوچون يوسوف كيمي بير اوغول ايتيرمك لازيم ايدي. يوسوفونون يوخلوغوندا گؤزلريني دونيايا كورلاشديراجاق قدر سئومك لازيم ايدي...

ايمتاهانلاري

باباسي ايبراهيم كيمي حضرتي ياقوب دا اؤولاد ايمتاهاني ايله سينانميشدي. يوسوفونو ايتيرميشدي. سئوديگيني ايتيرميشدي... اوغلانلاري خيانت ائتميشديلر. سئوديكلري ائتميشدي بو خيانتي. اوغلانلاري يوسوفونا خيانت ائتميشدي. بلكه باشقاسي ائتسيدي جزالانديراردي. آمما اوغلانلاري ائله‌ميشدي بونو. قارداشلارينا خيانت ائتميشديلر، آتالارينا خيانت ائتميشديلر. يوسوف اولماسا آتالاري اونلاري داها چوخ سئوردي، دئيه دوشونموشدولر. آتالاري‌نين سئوگيسينه قيسقانميشديلار قارداشلاريني. نفسلري عمللريني اونلارا سوسله‌يه‌رك گؤسترميشدي. [يوسوف، 83-100] ياقوب اوغلانلاري ايله ايمتاهان اولونموشدو. بو ايمتاهان اونا توككولو اؤيرتدي... بو ايمتاهان اونا اؤزونو تانيتدي. اؤزونو تانيماق اوچون يوسوفونو ايتيرمه‌لي ايدي...

نتيجه

بو قيسسه بيزه او قدر چوخ مئساژ وئرير كي...

تووككولون يالنيز و يالنيز اللها اولسون. سئوديگينيزي قوروماق اوچون سيزين تدبيرينيز كيفايت دئييل. اونو قوروماق ايسته‌ييرسينيزسه اونو اللها امانت ائدين.

گؤزلريني ايتيره‌جك قدر سئويرسنسه، مصردن گلن اتري دوياجاقسان.

اؤولادلاريني بير-بيرينه دوشمن ائده‌جك قدر شيطانا فورصت وئرمه.

يوسوفونو ايتيردينسه اللهين حيكمتينه صبر ائت.

پيس نيتليلرين الينه بهانه وئرمه. (ياقوب دئينه قدر اوغلانلاري "قورد يئدي" سسئناريسيني دوشونمه‌ميشديلر. اونلارين عاغيللارينا بونو ياقوبون سؤزو سالدي [يوسوف، 14].

قورخدوغونوز باشينيزا گلر...