باخیش
چهارشنبه 14 تیر 1391
بؤلوم | پئيغمبرلر یازار : نژادمحمد

حضرتي يوسوف

حضرتي يوسوف دئييلركن ايلك آغلا گلن گؤزلليك، ايففت و مرحمت سيمووللاري اولور. يوسوف گؤزلليگين تيمساليدير. يوسوف ايففتين تيمساليدير. يوسوف "آيي، گونشي و اون بير اولدوزو" قارشيسيندا سجده ائتديرن بير پئيغمبر مثاليدير. يوسوف قيسسه‌سي بير "پئيغمبر نئجه اولماليدير؟" سوالي‌نين جاوابيدير.

حضرتي ايبراهيمين نتيجه‌سي،

حضرتي ايسهاقين نوه‌سي،

حضرتي ياقوبون اوغلودور.

پئيغمبر نسلي‌نين پئيغمبر اؤولاديدير...

رسولوللاهين ان بؤيوك تسللي اؤرنييدير...

بو سوره رسولوللاه تايف صفريندن اوزگون حالدا دؤنركن نازيل اولموشدو. سانكي رسولا بير تسللي وئريردي.

ائي مككه‌نين يوسوفو! تايف سنين قويون، مككه زيندانين، هيجرت مصر يولچولوغون، يسريب سنين مصريندير [مدينن!]. يوسوفو گؤزله‌ين خوشبخت سونلوق سني ده گؤزله‌يه‌جك.

قويودان باشلايان يولچولوق سارايدا بيته‌جك.

بو تسللي اؤزونو دوغرولتدو. مككه‌نين يوسوفو مدينه‌نين سولطاني اولدو. و نينكي مدينه‌نين سولطاني، حتي بوتون موسلمانلارين قلبلري‌نين سولطاني اولدو. 14 عصردير او بو كورسودن هئچ ائنمه‌دي و هئچ ائنمه‌يه‌جك ده...

تايف ايتيردي، مدينه قازاندي.

يوسوفو دا قارداشلاري ايتيرميشدي، مصر ايسه قازانميشدي. يوسوف كيمي بير پئيغمبره قوجاق آچديغي اوچون مصر خوشبخت اولموشدو، مصر خلاص اولموشدو.

مصر هر زامان فيرعونلارين يوردو اولماييب كي...

يوسوف قيصه‌سي قورآني-كريمده يالنيز “يوسوف” سوره‌سينده ذكر اولونور. انام و مومينون سوره‌لرينده ايسه اونون ساده‌جه آدي كئچير.

موفسسيرلرين اتفاق ائتديكلرينه گؤره يوسوف سوره‌سي مككه سوره‌لريندندير، رسولوللاهين تايف دؤنوشو، هيجرت اؤنجه‌سي نازيل اولوب. و ايچينده هم مؤمينلره [رسولوللاهين شخصينده]، هم ده موشريكلره مئساژ داشييير: "سيزي قويويا سالسالار دا، كؤله كيمي ساتسالار دا، زينداندا چوروتمه‌يه چاليشسالار دا بيز سيزي خلاص ائده‌جك، مصره [مدينه‌يه!] سولطان ائده‌جييك."

.

قيصه‌لرين ان گؤزه‌لي

قورآنين سؤيله‌ديگي كيمي بو قيسسه قيسسه‌لرين ان گؤزه‌ليدير [احسني قيسساس]. قورآن بيزه “بيز بو قورآني سنه وحي ائتمكله سنه ان گؤزل هئكايه‌ني دانيشيريق” [يوسوف، 3] دئيير. ديگر پئيغمبرلرين قيسسه‌لري بير چوخ سوره‌لرده قيسا-قيسا هئكايه‌لر شكيلينده آنلاديليرسا دا، حضرتي يوسوفون قيسسه‌سي تاماميله يوسوف سوره‌سينده آنلاديلير و قيسسه‌لرين ان گؤزه‌لي اولاراق وصف ائديلير.

هئچ دوشوندوكمو كي:

نه اوچون قورآن يوسوف قيسسه‌سيني قيسسه‌لرين ان گؤزه‌لي اولاراق ذكر ائدير؟

بوردا دقت يئتيريلمه‌سي واجيب اولان عامل حضرتي يوسوفون فيزيكي گؤزلليگيديرمي، يا اونون ايففتين، مرحمتين سيموولو اولماسيمي؟

يوسوفو قويويا سالان قارداشلاريني، زيندانا سالان زولئيخاني باغيشلايا بيلمه‌سي ايديمي بو قيسسه‌ني باشقالاريندان آييراراق قيسسه‌لرين ان گؤزه‌لي ائدن؟

يوسوف قويودان چيخدي، آمما قارداشلاري‌نين ويجدانلاري قويودا قالدي...

اصل فلاكت سيزين قويودا اولمانيز دئييل، اورگينيزين و ذهنينيزين قويودا اولماسيدير. اصل فلاكت قويويا آتيلماق دئييل، قويويا آتان اولماقدير... سن اصلينده قارداشيني دئييل، اؤزونو قويويا آتيرسان. باشقا بير آيه‌ده دئييلديگي كيمي، “هر كس عملي‌نين گيروووندادير.”

“دوغروسو، يوسوف و قارداشلاري‌نين [قيصه‌سينده، اؤيرنمك] ايسته‌ينلر اوچون بير چوخ درسلر وار” [يوسوف، 7]

بيز بو درسي اؤيرنه بيلديكمي؟

يوسوف زينداندا آزاد ايدي، زولئيخا سارايدا اسير... آزاد اولا بيلمك اوچون زيندانيمي سئچيريك، اسير اولماق اوچون ساراييمي؟ بيز يوسوف اولوب زولئيخالاردانمي قاچيريق، زولئيخا اولوب يوسوفلاريمي قوووروق؟ بوردا ايففت شهوت دويماماق دئييل، دويدوغو حالدا بو ايسته‌يه قارشي گليب، زينادان اللها سيغينا بيلمكدير. گوناها ياخينلاشماماق اوچون اونا آرخا چئويرميي باجارماق، گوناها آرخادان گؤينه‌ييني جيرديرا بيلمكدير.

“منيم زولئيخام يوخدور!” دئمه. زولئيخا بير قادين اولمايا دا بيلر. بير مقام، بير مؤوقئ، پول، مال-مولك، بير سؤزله دونيا سئوگيسي ده اولا بيلر.

بوتون گوناهلارين باشيندا دونيا سئوگيسي گلميرمي؟

گوناهامي قاچيريق، گوناهدانمي؟ اونا دقت ائدك.

اگر كؤينه‌يينيز اؤندن جيريلاجاقسا سيز بونو هر كسدن گيزلتمه‌يه چاليشاجاقسينيز. چونكو بو سيزين ائييبينيزدير و سيز اونو گيزلتمه‌يه جهد ائده‌جكسينيز. يوخ اگر سيزين كؤينه‌يينيزي آرخادان جيرديراجاق بير ايففته صاحبسينيزسه، بو يالنيز سيزي دئييل، هم ده اطرافينيزداكي اينسانلاري دا اينشا ائدير. سيز بير نؤو دعوتچي اولورسونوز. يوسوف زولئيخادان قاچاركن اللها سيغينير و بونو ديله گتيرير. بو، بير مؤمينين حاليدير. يوسوفون تبليغ مئتودونو زيندان صحنه‌‌سينده ده گؤروروك. زيندان يولداشلاري‌نين يوخوسونو يوزمازدان اول اونلاري بير اولان اللها دعوت ائدير و يالنيز بوندان سونرا يوخونو يوزور.

ايمتاحانلاري

حضرتي يوسوف ايلك اول قارداشلاري ايله ايمتاحان اولونور. آتاسي‌نين اونا اولان سئوگيسيني آنلامايان قارداشلاري بو سئوگيني بوغماق اوچون يوسوفو اؤلدورميي بئله گؤزه آليرلار. يوسوف اولمازسا، آتالاري ياقوب اونلاري داها چوخ سئور، دئيه دوشونموشدولر. حضرتي ياقوب "ديگر اوغلانلاريني سئوميردي" دئيه بيلمريك. آمما حضرت ياقوب اوغلو يوسوفو داها چوخ سئويردي. او چوخ ياخشي بيليردي كي، "الله ياقوب سويو اوزرينده‌كي نعمتيني يوسوفلا تاماملاياجاق"

"بئله‌جه، رببين سني سئچه‌جك، سنه يوخولاري يوزماغي اؤيره‌دجك و اؤز نعمتيني بوندان اول آتالارين ايبراهيمه و ايسهاقا تاماملاديغي كيمي، سنه و ياقوب نسلينه ده تاماملاياجاقدير. شوبهه‌سيز كي، رببين بيلندير، حيكمت صاحبيدير!” [يوسوف، 6]

حضرتي ياقوب كيمسه‌نين بيلمه‌ديگيني بيليردي. حضرتي ياقوب كيمسه‌نين گؤرمه‌ديگيني گؤروردو. او اوغلو يوسوفو ساده‌جه بير آتا محبتي ايله سئوميردي، هم ده بير پئيغمبري سئورجه‌سينه سئويردي. قيسقانجليقدان "كور" اولان اوغلانلاري بونو بيلميردي، هاردان بيلرديلر كي...بيلسه‌لردي اللهين تقديرينه قارشي گلمزديلر. بونو غؤرمك اوچون باخماق كيفايت دئييل، باخديغيني دا گؤرمك لازيم ايدي. نئجه كي، حضرتي ياقوب كور گؤزو ايله بونو گؤرموشدو. يوسوفون ساغ اولدوغو خبريني آلماميشدان اؤنجه اونو عطيريني اوزاق مصر ويلايتيندن دويموشدو. اونون فيزيكي گؤزو كور اولموشدوسا دا قلب گؤزو گؤروردو...

يوسوف قارداشلاريني باغيشلادي... چونكو اونون دا قلب گؤزو آچيق ايدي. قويودا ترك ائديلركن اللهدان وحي آلميش، بونو بير سيناق اولدوغونو آنلاميشدي. او دا قارداشلاري‌نين گؤره بيلمه‌ديگيني گؤرموشدو. قويودا ترك ائديلمه‌يينه عصيان ائتمه‌دن اللهين تقديرينه بويون ايميشدي.

يوسوفون ايكينجي ايمتاهاني كؤله كيمي ساتيلماق ايدي. كؤله كيمي ساتيلدي، آمما هئچ بير زامان كؤله اولمادي... كؤله اولا بيلمزدي. چونكو او بير "قول!" ايدي و بو قوللوغونون يولوندا بوتون ايمتاهانلارا لاييقي ايله صبر ائديردي.

اوچونجو ايمتاحان بير قاديندان - شهوتدن گلدي. بلكه ده بوتون حدئييل، مشرو اولمايان شهوته "يوخ!" دئييردي. و بوندان اللها سيغينيردي.

قارداشلاري اونو قويويا آتاركن او بير مظلوم ايدي. ظلمه اوغراميشدي.

كؤله كيمي ساتيلاندا او سئچيم ائده بيلمه‌ميشدي. بورادا دا تسليميت گؤستره‌رك قدره بويون ايميشدي.

زولئيخايا آرخا چئويرنده ايسه يوسوفون سئچيم حاقي وار ايدي. بورادا سئچيمي او ائديردي. و يوسوف زيندانا هيجرت ائتدي. زولئيخانين تله‌سينه دوشمه‌مك اوچون رببيندن يارديم ايسته‌دي، اونا سيغيندي.

زيندان يوسوفون سون ايمتاهاني اولدو. بورادا دا عصيان ائتمه‌دي. چونكو بونو اؤزو سئچميشدي. زيندان زولئيخادان گلن ايمتاهاندان چيخيش يولو ايدي. بوتون ايمتاهانلاري‌نين بير گون خوشبخت سونلوقلا بيته‌جه‌ييني بيليردي. و بير گون گؤزله‌ديگي گون گلدي.

يوسوف، اونو زينداندان آزاد ائتمه‌يه گلن كرالين آداملاريندان ايسه بير خاهيش ائتدي. گوناهسيزليغيني اعتراف ائتسينلر، اوندان سونرا او زينداني ترك ائده‌جك. كيمسه‌نين گؤزونده لكه‌لي قالماق ايستميردي. يوسوفون مقصدي اؤزونه براعت قازانديرماق دئييلدي، حاقي، عدالتي برپا ائتديرمك ايدي.

يوسوفون يوخوسو سونوندا گئرچكلشدي. اونا "سجده" ده ائتديلر. بونو الله اوچون ائديلن سجده ايله قاريشديرماق اولماز. بو ملكلرين آده‌مه ائتديكلري سجده‌نين (تزيم) عينيسي ايدي. يوسوفون يوخوسو بوتون ايمتاهانلاريني لاييقي ايله وئرديكدن سونرا گئرچكلشدي...

سوره سون آيه‌لرينده “بو، هر كسه ساده‌جه بير خاتيرلاتمادير” دئيير. [يوسوف، 104] بيزه بير هئكايه دانيشير و “بو ساده‌جه خاتيرلاتمادير” دئيير... بيزه گؤزل بير هئكايه دانيشير و خاتيرلاتمادير دئيير. خاتيرلاتديقلاري ايسه عيبرتليك اؤرنكلردير: اللهين تقديرينه قارشي چيخما، كؤله اولما، اخلاقلي، ايففتلي اول كي، سنه شر آتا بيلمه‌سينلر، بضا حقيقي آزادليق اوچون زيندان چيخيش يولو اولا بيلير...

"يوسوف قيسسه‌سي" قيسسه‌لرين ان گؤزه‌ليدير.

يوسوف سوره‌سي بيزه باشدان سونا قدر حضرتي يوسوفون قيسسه‌ني آنلادير. يوسوفون يوخوسوندان باشلايان هئكايه اونون يوخوسونون رئاللاشماسي ايله سونا چاتير.

الله ديله‌ديگينه ساده‌جه “اول!” دئير. سيز اونو قويويا سالسانيز دا، زيندانا آتسانيز دا اللهين ايراده‌سينه مانع اولا بيلمزسينيز.

ايكي

بو قيسسه‌ده قريبه بير ايكيليك وار. يوسوف دا يوخو گؤرور، مصر كرالي دا.

بيرينجي "يوخو" يوسوفو قويويا سالير، ايكينجي يوخو يوسوفو زينداندان چيخارير.

زيندان يولداشلاري‌نين ايكيسي ده يوخو گؤرور.

ياقوب دا يوخو يوزور، يوسوف دا.

قارداشلارين دا دليلي كؤينكدير، زولئيخانين دا. سوندا ايكيسي ده ياقوبا وئريلير. بيري “يوسوف اؤلدو!” دئيه گتيريلركن، او بيري "يوسوف ساغدير" مئساژيني داشييير. بيري ياقوبو بو حسرتدن كور ائدركن، او بيري وصالدان خبر وئره‌رك كور گؤزلرينه ملهم اولور.

يوسوف زيندانا "ايكي" دفعه‌‌ آتيلير؛ بيري زولئيخا طرفيندن، ديگري يوخوسونو يوزدوغو زيندان دوستوندان اونو كرالين يانيندا خاتيرلاتماسيني ايسته‌ديگينده... يوسوف بير آنليق يانليش ائدير. و بو اونا باها باشا گلير. يارديمي اللهدان دئييل، زيندان دوستوندان ايسته‌يير. الله دا عوضينده اونو داها بير نئچه ايل اوردا ساخلايير. زيندان يولداشي كرالين يوخو گؤرمه‌سينه قدر يوسوفو “اونودور”.

يوسوفون قويويا دا آتيلماسي‌نين سببي سئوگي ايدي، زيندانا دا. قارداشلاري اونو آتالارينا قيسقاناراق قويويا آتير، زولئيخا اونون سئوگيسينه آرخا چئويرديگي اوچون زيندانا آتير...

قارداشلاري دا گوناه ايشله‌دي، زولئيخا دا... اونلار دا گوناهلاريني اعتراف ائديب تؤوبه ائتديلر، زولئيخا دا... يوسوف دا هر ايكيسيني باغيشلادي.

يوسوف دا پئيغمبر ايدي، آتاسي ياقوب دا...

هيجرت

هر پئيغمبرين حياتي‌نين بير هيجرت دؤنمي وار. يوسوفون هيجرت يولچولوغو قارداشلاري‌نين اونو آتديغي قويودان باشلادي... “بير موهاجير نه ائده بيلر؟!” دئينلر يوسوفا باخسين. قويويا آتيلماق، كؤله كيمي ساتيلماق، ايففت قارشيليغي زيندانا ترك ائديلمك... بوتون بونلار مانعه اولا بيلمز و بيلمه‌دي ده. اولسا-اولسا ساده‌جه "اقتدار" يولچولوغوندا بير ايمتاهاندير. يوسوف بو ايمتاهاني اوز آغليغي ايله وئردي. قويويا ترك ائديلركن رببي‌نين مئساژيني آلان يوسوف [يوسوف، 15] زولئيخانين شرعيندن ده رببينه سيغيندي [يوسوف، 23]، رببينه هيجرت ائتدي.

بوتون اولانلار اللهين مورادي‌نين گئرچكلشمه‌سي اوچون ايدي. حضرتي يوسوف بو ايلاهي سسئناريده “قول!” رولونو اويناميش، قارداشلاري و زولئيخا ايسه يانليش رول سئچميشديلر. يوسوفون ايففتي و اهوي سايه‌سينده اونلار سهولريني آنلاميش و گوناهلاريني اعتراف ائتميشديلر. بوتون هيجرتلر كيمي حضرتي يوسوف دا هيجرتي قلبه ايله بيتميش، اونا خيانت ائدنلر سوندا تزيم مقصدي ايله اونا سجده ائتميشديلر. بورداكي سجده حضرتي آده‌مه اوستونلوك تيمسالي اولاراق ائديلن سجده ايله عينيدير. بير زامان ملكلر ده آده‌مين اوستونلويو قارشيسيندا اونا سجده ائتميشديلر. حضرتي يوسوفا دا سجده ائديلدي.

رببي اونو سئچه‌رك اوستون ائتدي. چونكو او، “ياخشيليق ائدنلري بئله موكافاتلانديرير” [يوسوف، 22]

حضرتي يوسوفون قويودان مصره سولطان اولاراق گئتمه‌سي قويويا آتيلانلارا بير موژده وئرير:

ائي دؤورونون يوسوفو! سولطانليغا گئدن يول بضا قويولاردان، بضا زيندانلاردان، بضا ده كؤله اولماقدان كئچير. اگر سن دونيا آدلي زولئيخانا آرخا چئويره بيله‌جك بير ايففته صاحبسنسه اوندا امين اول كي، بير زامان موطلق سن ده دؤورونون مصرينه سولطان اولاجاقسان...