باخیش
یکشنبه 14 اردیبهشت 1393
بؤلوم | حج یازار : نژادمحمد

آتا ميراثي  
      
ارافا - آدمله حوّانين گؤروش يئري. 
كعبه - آدمين اينسانليغا “ائو” ميراثي. 
صفا و مروه تپه‌لري - حاجرله ايبراهيمين آيريليق مكاني.  

حاجر، هيجرتين گليني. 
ايبراهيم، آتشين قنيمي. 
ايسماييل، قوربانليغين سيموولو. 

آدم اينسانليغين ايلك ائويني تيكدي. بيزه “ائو” آنلاييشيني ميراث قويدو.  
آدم ياساق اولمايان جنّته گئده بيلمك اوچون ياساق اولان جنّتيندن هيجرت ائتدي. ارافادا حوّاسينا قوووشدو. اوردا مسكن سالدي و اينسانليغا، - بوتون واريثلرينه، - بير ائو ميراث قويدو. كبه هر كسين "آتا يوردو" اولدو... 

ايبراهيم ايسماييللا اونو برپا ائتدي و ميراثيميزا صاحب چيخماغي اؤيرتدي بيزه. 
و بير ده بوتون واريثلري آتا يوردونا، - باشلانغيجا، - دعوت ائتدي… 
بيزي تاريخه سياحت ائتمه‌يه سسله‌دي. ائوين نه دئمك اولدوغونو آنلاماغيميزي ايسته‌دي…  

بير گون حاجه‌ر ده هيجرت ائتدي… 
ايبراهيم ربّي‌نين امري ايله ايكي جييرپاره‌سيني او تورپاقلاردا امانت اولاراق قويوب گئتدي. اينسان ياشامايان، قوش اوچمايان، تيكان بئله بيتمه‌ين بو اراذيلره ايبراهيم عائله‌‌‌سي صاحب چيخدي. آتا اوجاغي‌نين ايشيغيني يانديردي. و بوتون اينسانلاري بو ايشيغا سسله‌دي… 

حاجر هيجرته يولا چيخدي… 
سئوديكلري‌نين خطري اوچون بو رولو اوينادي. 
ربّيني سئويردي. قدرينه تسليم اولدو. 
ايبراهيميني سئويردي. اونا قارشي چيخمادي. اونو تنها بير صحرادا قويوب گئدركن آغلامادي، سيزلامادي… آرخاسيندا بوراخديغي راحت ياشاييشي اوچون عصيان ائتمه‌دي. 
ايسماييليني سئويردي. اونو قوروماق اوچون “ساي” ائتدي. دورمادان، دايانمادان، اوسانمادان. سويو تاپانا قدر يورولدوم، اوسانديم، بئزديم دئمه‌دي. “ساي” ائده بيلن هر كسه “سونوندا زم-زم” وار مئساژيني وئردي. زم-زم آرتيق كشف اولونوب. يئري ده بلليدير. عامّا نه قريبه‌دير كي، ساي ائتمه‌دن زم-زم ايچيلمير. زم-زمه قوووشماق اوچون حاجه‌رين رولونو اويناماق واجيبدير. زم-زم زحمتله الده اولونان نعمتدير. قدري بيلينمه‌سي، ديَري آنلاشيلماسي اوچون “قاچيش” لازيمدير.  

آدم آتاميز بيزه كعبه‌ني ميراث قويدو. 
حاجه‌ر آناميز زم-زمي… 

ايبراهيم اونو ربّينه امانت ائديب گئتميشدي. حاجه‌ر ده جييرپاره‌سيني ربّينه امانت ائده‌رك صفا – مروا تپه‌لري آراسيندا آختاريشا چيخدي. اونو هيجرته يوللايان ربّي اونو كيمسه‌سيز و چاره‌سيز بوراخماياجاقدي. حاجه‌ر بونو بيليردي. لاكين گؤيلردن معجزه‌‌ گؤزلميردي. اونون اوچون تسليميّت عطالت دئييل، حركت ايدي. سو آختاريشينا چيخماقلا سانكي ربّي‌نين قدرينه تسليم اولدوغونو بَيان ائتدي: "بورايا گؤندريلمم مصلحتديرسه، دئمه‌لي بورادا منيم ده، اؤولاديمين دا ياشاييشي اوچون احتياجيميزي اؤده‌يه‌جك قدر روزي ده وار" دئيه دوشوندو. حاجه‌ر، او روزيني اؤزو اوچون دئييل اينسانليق اوچون آختاريردي. اونا گؤره ده زم-زم بوتون اينسانليغين اوتراق ميراثيدير. كعبه كيمي… 

زم-زمين كشفي ايله ايبراهيمين دوعاسي دا گئرچكلشميش اولدو: "ربّيم! من نصليمي سنين موقدس ائوينين يانينا، اكينچيلييه ال‌وئريشسيز بير وادييه يئر‌لشديرديم. ربّيم! قوللوق ائتسينلر دئيه، بئله ائتديم. اينسانلارين كؤنوللريني اونلارا مئيل ائتدير. شوكور ائتمه‌لري اوچون اونلاري محصوللارلا روزيلندير". [حجّ،37] 
ايللر سونرا گئري قاييدان ايبراهيم بو واديده تنها بوراخديغي عائله‌‌‌سي‌نين ربّي طرفيندن نئجه قوروندوغونا شاهيد اولدو: ربّي اونون دوعاسيني قبول ائتميش، “اينسانلارين كؤنوللريني اونلار مئيل ائتديرميشدير.” 
آرتيق حجر تك دئييلدي. زم-زمه قوووشماقلا حاجه‌ر تنهاليغين “داشيني آتدي”. داها هئچ بير زامان تك اولمادي... 

او موقدس تورپاقلارا گئدن هر كس حاجر اولور، صفا-مروه آراسيندا سو آختارير. ايللرين اونون اوزرينده بوراخديغي هيسيني، كيريني، پاسيني تميز‌له‌مك اوچون “زم-زم” آختاريشينا چيخير. بضا او سو “گؤز ياشي” اولور، اوزوندن قلبينه آخير، زم-زمه قاريشير... بوتون گوناهلاريني او گؤز ياشي يويور، "حاجه‌ر" اولوب گوناهدان ثاوابا هيجرت ائدير. بضا او سو “آلين تري” اولور. اومّتين يوكونو چكن، دردينه يوكلنن اينسانلارين آلين تري... 

او تورپاقلارا گلن هر كس: "ائي ربّيم! آتام آده‌مين تيكديگي، ايبراهيمين برپا ائتديگي ائوين باشينا دؤنمك اوچون، گوناهلاردان تميزله‌نيب تزه دوغولموش كيمي گوناهسيز اولماق اوچون من ده گلديم. اؤز آتا يوردوما، ايستي اوجاغيما گلديم. تام تسليميّته گلديم. آتام ايبراهيم چاغيردي، گلديم. آنام حجرين تسليميّتيني ياشاماغا گلديم. كونفورتومو و راحتليغيمي ترك ائديب، ايلك باشلانغيجا دؤنمك، كيم اولدوغومو بيلمك، اصل ديَرلري آنلاماق اوچون گلديم...” 
سئونلرين ووصال يئري اولان كبه‌يه گلديم.  
آيريليقلارين بيتديگي مكانا گلديم.  
اينسانليغين اورتاق ديَرلرينه صاحب چيخماغا گلديم. 
واريثم! ورثه‌‌‌ليگيمي تصديقه گلديم! 
ايسماييليمين دوداقلاري سوسوزلوقدان جادار-جادار اولوب. اونا زم-زم آختارماغا گلديم. ساي ائتمه‌يه گلديم.  
سنين دعوتينه گلديم... 
قبول ائدرسنمي؟!"