باخیش
شنبه 27 خرداد 1391
بؤلوم | عومومی یازار : نژادمحمد

من شیطانام!!!

من اؤزومو سیزدن اوستون ساییرام. چونكی سیزه تأثیر ائده بیلیرم. اؤزومو قالیب سانیرام. قلبه منیمدیر. هر بیرینیزده آز دا اولسا وارام. منی لعنتله‌ییرسینیز، آمما اوندان سیزه ده پای دوشور. چونكی من سیزم! اولمادیغیم قلب یوخدور! منی قووماغا هئچ بیرینیزین گوجو چاتمادی...

اللها اطاعته گئجیكدینیز، آدینا تنبللیك دئدینیز. منی تانیمادینیز- سئویندیم...

بعضینیز منه تاپیندی- قورره‌لندیم...

هر گون ان آزیندان بیر دفعه‌‌ منیم گؤستردیگیم یولدان كئچدینیز- فرحلندیم...

اوجالیب اللها دئدیم: "یاراتدیغین ان كامیل وارلیق منه اودوزور"

جاواب گلمه‌دی. بیلیرم "سن جهنمده یاناجاقسان" ائشیده‌جیدیم. آمما سئوینمه، ائی اینسان. من تك اولمایاجاغام. من یاناندا سن ده بیر كونجده ویجدانی‌نین سسینده بوغولاجاقسان! سن ده اودون ایچینده اولاجاقسان! دوشونمه كی، عیبی یوخ. اورداكی عذابلار بیتمزدیر، داها آغریلیدیر.

من شیطانام. لعنتله‌یین منی! آمما ایچینیزدن چیخاریب آتا بیلمزسینیز. هئچ واخت اولماییب كی، من اولمادان هانسیسا جمعیت قورولسون. ایسته‌دینیز. ایسته‌یینیز عمللرینیزله اویوشمادی. منسیز جمعیتلری كاغیذ اوزرینده یاراتدینیز، اوردا دا قالدی.

من شیطانام. سن اینسانسان.

آدیم بللیدیر، معلومام. آمما سنین ایچینده منی هئچ كیم تانیمیر. هئچ سن ده تانیمیرسان.

بعضیلرینیز یوخسوللارا ظلم ائدیب حاقلارینی آلدینیز. دؤولت، ایمپئرییا آدلی اویونجاقلار قوردونوز. رهبر سئچدینیز. آمما منی ده اونوتمادینیز. رهبرینیزین قلبینده ده یئر توتدوم. منه مقاومت گؤسترمه‌دی هئچ. قانینیزی، جانینیزی، مالینیزی الینیزدن آلدی. سسینیزی ده چیخارتمادینیز. چونكی ناحاققی سیزه حاق كیمی تانیتدیردیم. گؤزونوزو توتدوم. دولاییسییلا رهبرینیز من اولدوم.

من شیطانام. منی هئچ كس سئومیر!

سیز جوت اولاندا یولدان چیخارماق آساندیر سیزی! بیرینیزین قلبینده وارامسا، او بیرینیزین ده گؤزلرینده وارام. باخدیغینیز اونون دئییل منیم گؤزلریمدی. سئوگی دئدینیز آدینا- آمما چوخوندا من واردیم.

دوستونوزون فیكیرلرینه گیردیم. اونو سن باشقا گؤزلرله گؤردون. سنه دوست یوخ، اؤزومو- شیطانی قازاندیردیم. سن دوستونو یوخ منی سئودین. آمما هله ده خبرین یوخدور. چونكی من شیطانام. منی هئچ كیم تانیمیر.

دیلینیزی من ایداره ائتدیم. آجیلادینیز سئودیكلكرینیزی. ائلئ سؤزلر دئدیرتدیم كی، اوچوروملار قدر اوزاقلاشدینیز بیر بیرینیزدن. ائله حركتلر ائلتدیردیم كی، ایندی اوتانیرسینیز. اوتان، ائی اینسان! اؤزوندن اوتان! منیم گوناهیم یوخدور كی... وظیفه‌‌م، مقصدیم بودور. چونكی من سنین هر گون لعنت اوخودوغون شیطانام!

اؤولادلارینیزا یاخینلاشدیم. "آتا-آنان سنی سئومیر" دئدیم. ایناندی. سیزه نیفرت بسله‌دی. الینه دوشن ایلك ایمكاندا قاچدی سیزدن.

والیدئینلرینیزه یاخینلاشدیم. "اؤولادلارینیز سیزدن آیریلارسا بدبخت اولاجاق". آتا-آنا اورگی دؤزمه‌دی. سیزی بوخوولاماغا چالیشدیلار. سیز ده نیفرت بسله‌دینیز...

سئوگیلیلره یاخینلاشماغا احتیاج گؤرمه‌دیم. سئوگی ده منیم اویونومدور. اؤزونوزو بئله اونودوبسونوز!.

وارلی اینسانلارا " اونلار سیزین گئتدیگینیز یوللارلا گئتمه‌یه لاییق دئییللر، اونلار آجدیرلار". اؤزلری اوچون آیری یول سئچدیلر.

آجلارا "الله سیزی سئومیر، سئوسیدی...". ناماز قیلماغی دایاندیردیلار. اللها آسی اولدولار.

گنجلره "سیزه قولاق آسمیرلار. اؤلدورون، زورلایین، اویون". آخماقلار، بعضیلری درحال ایناندیلار.

گوجوم چاتمایانلاری قلبلرینده اولدوغوم رهبرلرینیز ازدیلر...

من شیطانام. دوستلاری، سئوگیلری، دؤولتلری، جمعیتلری قورآن دا منم، داغیدان دا...

من شیطانام. جوت اولاندا سیزه قالیب گلمك داها آساندیر. چونكی شهوت حیسسینیزه حاكمم...

من شیطانام. تك اینسانلار منه چتین مغلوب اولورلار. چونكی هئچ كیمه یولوخمورلار...

من شیطانام. شهیدلره، عجلی ایله اؤلنلره حئیفسله‌نیرم. منیم اؤز اؤلوم پلانیم وار- اینتیهار...

بضا دوز گؤزومون ایچینه باخیرسینیز. بیلیرسینیز هاردا، گوزگوده.. گؤزلرینیزه باخین، منی گؤره‌جكسینیز. چونكی...

من شیطانام. بوتون وارلیغینیزا حاكمم...