باخیش
پنجشنبه 19 خرداد 1390
بؤلوم | مقاله لر یازار : نژادمحمد

ايسلامدا فالين حرام اوْلماسي

مۆسلمان جمعيتلري فال و سئهر كيمي مؤوزولاردا اجنبي مدنيتلرين و اينانجلارين تأثيره آلتينا دۆشموش، بۇ حاللار گئت-گئده آرتميشدير. شۆبهه‌سيز كي، بۇرادا اينسانين گيزلي اوْلانا، بيلينمه‌ينه قارشي حيسس ائتديگي ماراغين و گله‌جكده اؤزو و اطرافي حاقيندا بيلينمه‌ينلري بيلمك ايستيي‌نين بؤيوك روْلو واردير.

بئله ايشلرله مشغول اوْلان اينسانلارين اطرافيندا علم آداملاري‌نين و جمعيتده مۆعيين سويه‌يه گلنلرين اوْلماسي چوْخ ماراقليدير. دوْلاييسي ايله بئله حادثه‌لر بيليگين آزليغيندان دئييل، حقيقي ديني معلومات و دۆشونجه آزليغيندان ايره‌لي گلير. بۇنلاري اؤيرنمه‌يين يوْلو ايسه ايسلام دينينين اؤيره‌نيلمه‌سي و اؤيره‌ديلمه‌سيدير.

ايسلامدا قئيب عاغيل و حيسسلر واسطه‌سيله بيلينمه‌ين وارليق عالمي كيمي گؤستريلير. مۆطلق قئيبي بيلمك ايسه يالنيز اللها مخصوصدور. اوْندان باشقاسي قئيبي بيلمه‌ديگي كيمي هز.پئيغمبر (س) ده

قئيبي يالنيز اللهين بيلديرمه‌سيله بيلميشدير («اراف» سۇره‌سي، 7/188؛ «انام» سۇره‌سي، 6/59). ملكلرين بيليب اينسانلارين بيلمه‌ديگي، اينسانلاردان بيري‌نين بيليب ديگرلري‌نين بيلمه‌ديگي مسئله‌لر كيمي نيسبي قئيب عالمي ايسه اللهين ايزني ايله اينسانلار طرفيندن بيلينير. قئيب عالميندن خبر وئرن اينسانلار حاقيندا حديسلرده آغير و خبردارئديجي ايفاده‌لر ايشله‌ديلير (مۇسليم، “سالام”، 125).

گله‌جك حاقيندا اؤيرنمك، بخت و قيسمتي بيلمك مقصديله كارت، قهوه فينجاني و نوْخوددان ايستيفاده ائده‌رك، عيني زاماندا اوْووجا باخاراق گله‌جيي بيلديرمه‌يه فال، همين ايشلرله مشغول اوْلانا فالچي، كاهين و يا مئديوم (گۇيا رۇحلارلا علاقه‌ يارادان) دئييلير. ايسلام دينينده جاهيليه عادتلريندن حساب ائديلن فال اوْخلاري ايله قيسمت آختارماق قاداغان ائديلميش («مايده» سۇره‌سي، 5/3)، كاهينليك و فالچيليغين بۆتون نؤولري حرام بۇيورولموشدور (ابن ماجه، “تاهارت”، 122).

بعضي حديسلرده (بۇخاري، “تيبب”، 42؛ مۇسليم، “سالام”، 110-119) مۆعيين دليللره اساسلاناراق مۆسبت شرحلرين اۇيغون قبول ائديلمه‌سينه باخماياراق، اۆميد¬سيز¬ليك و اۇغورسوزلوق حيسسلرينه قاپيلماق دوْغرو حساب ائديلمه‌ميشدير. عاغيل و ايراده‌سي‌نين كؤميي ايله اينساني بۇ سببلره باغلي اوْلماقدان اۇزاقلاشديران بئله آنلاييشلار ايسلام دينينه ضدير. بۇنلاري كنارلاشديران فال و فالچيليق - دۇز فالي، قهوه فالي، قۇرغوشون اريتمك، اوْووج فالي، قۇران و كيتاب فالي دينيميز طرفيندن قاداغان ائديلميشدير.

فالين نؤولريندن بيري ده اۇلدوز و بۆرج فاللاريدير. ايسلامدا آستروْنوْمييا علمينه اهميت وئريلميش، لاكين سما جيسملري‌نين حركتلرينه باخاراق بۇنلاردان دۆنياداكي حادثه‌لرين و اينسانلارين گله‌جيي ايله باغلي نتيجه‌لر چێخارماقلا مشغول اوْلان آستروْلوْگييايا ايسه مۆسبت ياناشيلماميشدير. چۆنكي اۇلدوز و بۆرج فالي هم ايسلام دينينين تؤوهيد اينانجينا، هم ده “موتلق قئيبي يالنيز الله بيلير” كيمي اساس پرينسيپه ضدير.

ايسلام دينينده سوْنرادان اوْلاجاق حادثه‌لر حاقيندا “خبر وئرمك” معناسيندا اوْلان كهانت ده همين سببلرله قاداغان ائديلير، بۇنو ائدن اينسانلار (كاهينلر) و اوْنلارين دئديكلرينه اينانانلار حاقيندا جنّته گيرمه‌مك (“موسند”، اێێي. 14) و عبادتلرين ثاوابيني قازانماماق كيمي (مۇسليم “سلام”، 33) آغير و قێنانان ايفاده‌لر ايشله‌ديلير.

جيندارليق دا قئيبدن خبر وئرمه‌يين بير نؤوعدور. جين اينسانين حيسس اوْرقانلاري ايله بيلينمه‌ين، شعور و ايراده‌يه صاحب اوْلان، ايلاهي امرلرله حركت ائدن وارليقدير. اينسانلار كيمي اللها عبادت ائتمك اۆچون ياراديلان جينلر اينسانلارلا مۆقاييسه‌ده فرقلي خۆصوصيتلره ماليك اوْلسالار دا، قئيب عالميني بيلميرلر («انام» سۇره‌سي، 6/100، 116؛ «هيجر» سۇره‌سي، 15/27). حديسلرده ده جينلرله باغلي تفسيلاتلي معلومات وئريلمير. بيلمك لازيمدير كي، جينلر حاقيندا آيه و حديسلرده بيلديريلنلر خاريجينده‌كي معلوماتلار قديم ايران، تۆرك و هيند مدنيتلريندن كئچميشدير.

مؤمين اللهين ايجازه‌سي اوْلمادان جين ده داخيل اوْلماقلا، هئچ بير وارليغين ضرر وئره بيلمه‌يه‌جه‌يينه اينانمالي، جين و ديگر وارليقلاردان گلمه احتيمالي اوْلان ضررلردن اللها سێغينمالي، قۇران اوْخومالي، ايسلاما تام عمل ائتمه‌ليدير. بئله كي، هز.پئيغمبريميز (س) جينلرين اينسانا تأثيرينه قارشي «آيتول-كۆرسي»ني و «مۇاوويزتئين» آدلانان «فلق» و «ناس» سۇره‌لريني اوْخوماقلا بۇ مسئله‌ده اينسانلارا نۆمونه گؤسترميشدير.

ديليميزده باشدا سئهر، گؤزمونجوغو (دۇعا كيمي شئيلر) تاخماق و جيندارليق كيمي مادي-معنوي واسطه‌لردن منفي يؤنده ايستيفاده ائده‌رك بعضي مقصدلري حياتا كئچيرمك سيي اوْلاراق قييمتلنديريلن سئهر، عرب ديلينده ايسه “سيهر” سؤزو ايله ايفاده ائديلير. سئهر ايسه ماگييا و حيله‌ يوْلو ايله اينسانلاري تأثيره سالاراق طبيعت قانونلارينا ضد حادثه‌لر گؤسترمه‌يه چاليشماق و اينسانلاري آلداتماق صنعتي كيمي بيلديريلير. قۇراندا پئيغمبره گؤندريلن وحيين حاق اوْلدوغو، سئهرله هئچ بير علاقهسي‌نين اوْلماديغي، پئيغمبرلرين ده سئهرباز حساب ائديلمه‌يه‌جيي بيلديريلميش، سئهيربازلارين يالانچي اوْلدوقلاري قئيد ائديلميشدير («اراف» سۇره‌سي، 7/116؛ «يۇنوس» سۇره‌سي، 10/76-77، «تاها» سۇره‌سي، 20/69؛ «زۇخروف» سۇره‌سي، 43/30؛ «زارييات» سۇره‌سي، 51/52). سئهر يئددي بؤيوك گۆناهدان بيريدير (مۇسليم “يمان”، 144).

سئهرين حقيقي اوْلماسي و تأثير درجه‌سي ايله باغلي مۆزاكيره‌لر بير كنارا، ايسلام عاليملري‌نين فيكرينجه، اللهين ديله‌مه‌سي خاريجينده بۇ هئچ كيمه ضرر وئره بيلمز. مۆسلمانين سئهرله مشغول اوْلماسي و يا سئهر ائتديرمه‌سي حرامدير. سئهرين تأثيريندن خلاص اوْلماق اۆچون اللها سێغينماق، عبادت و دۇعا ائتمك، يوْخسوللارا صدقه‌ وئرمك لازيمدير.