باخیش
پنجشنبه 19 خرداد 1390
بؤلوم | مقاله لر یازار : نژادمحمد

قۇرانا گؤره دۇعا

سيزي يارادان، بۇ دۆنيادا مسكونلاشديران، شعور و بدن صاحبي ائدن اللها لازيم اوْلدوغو قدر ياخينسينيزمي؟ اوْنا آخيرينجي دفعه‌ نه واخت دۇعا ائتميسينيز؟ اللها تكجه بعضي چتينليك و بلالارلا اۆزلشنده يالواريرسينيز، يوْخسا هميشه اوْنو خاتيرلاييب، ياد ائديرسينيز؟ دۇعا ائدنده اوْنون سيزه چوْخ ياخين اوْلدوغونو، سيزين پێچيلتي ايله تلفّوظ ائتديگينيز و يا اۆرگينيزدن كئچيرتديگينيز هر سؤزو ائشيتديگيني درك ائديرسينيزمي؟ اللهين بۆتون اينسانلارين و هر شئيين رببي، حياتداكي ان بؤيوك دوْستونوز و حمايه‌دارينيز اوْلدوغونو دۆشونورسونوزمو؟ هر شئيي خۆصوصيله رببيميزدن ايسته‌مه‌يينيز لازيم گلديگيني فيكيرلشيرسينيزمي؟

قۇراندا دۇعانين اهميتي حاقدا: «...اگر دۇعانيز اوْلماسا، رببيمين يانيندا نه قدير-قييمتينيز اوْلار؟» («فۇرقان» سۇره‌سي، 77) آيه‌سي ايله خبر وئريلير.

اللها دۇعا ائده‌رك، اوْنا ياخينلاشماقدا هئچ بير محدوديت يوْخدور. دئمك كي، هامي بۇ يوْلو منيمسه‌مكله و تكرار ائتمكله ابدي حياتينا خئيير تعمين ائدر.

دۇعا اللهلا اينسانلار آراسينداكي علاقه‌ يوْلودور. اللهلا علاقه‌ ياراتماق احتياجي ايسه اينسانين طبيعتينده، يعني ياراديليشيندا مؤوجوددور. اينانانلار اۆچون دۇعا ائتمك حياتلاري‌نين آيريلماز و چوْخ طبيعي بير حيصه‌سي اوْلدوغو حالدا، اكثريت اۆچون آنجاق بؤيوك چتينليكلره مروز قالاركن، حياتينا اوْلان تهلوكه‌لرله اۆزلشركن خاتيرلانان بير عبادتدير. البته‌ كي، بۇ سوْنونجو ايفاده ائتديگيميز دۇعا طرزيني الله مقبول حساب ائتمه‌يه بيلر. اساس خئييرلي اوْلان هم راحتليقدا، هم ده چتينليكده اللهدان كؤمك ايسته‌مكدير. بۇنا گؤره ده صميمي اوْلاراق اللها دۇعا ائده بيلمه‌يين يوْللاري قۇراندا اطرافلي بيلديريلميشدير.

قۇرانين اكثر آيه‌لرينده بيرباشا و يا دوْلايلي يوْللارلا دۇعا مسئله‌سي قئيد ائديلير. تكجه بۇنون اؤزو ده دۇعا مؤوزوسونا نه قدر اهميت وئريلمه‌لي اوْلدوغونو گؤسترير. ديگر طرفدن دۇعا ايله علاقه‌لي آيه‌لر اوْخوناندا دا بۇنون نه درجه‌ده واجيب بير عبادت اوْلدوغو داها ياخشي آيدين اوْلور.

«چاغيرماق، ايسته‌مك، كؤمك طلب ائتمك» معنالارينا گلن دۇعا سؤزو قۇرانا گؤره «اينسانين بۆتون منليگي ايله اللها اۆز تۇتماسي» و يا «گۆجو محدود و سوْنلو اوْلان اينسانين محدوديتسيز و سوْنسوز قۆدرت قارشيسيندا عاجيزليگيني قبول ائده‌رك كؤمك ايسته‌مه‌سي» كيمي بيلديريلير.

اللها اينامي اوْلان هر بير اينسانين مۆختليف فوْرمالاردا دۇعا ائتديگي معلوم اوْلان بير مسئله‌دير. آنجاق اكثر اينسانلار دۇعاني تكجه چتينلييه دۆشنده و سێخينتيلي واختلاريندا، اللريندن گلن بۆتون احتيماللار يوْخلاناندان سوْنرا اللهي خاتيرلاماق شكلينده باشا دۆشورلر. بۇ جۆر آداملار ياشاديقلاري سێخينتييا سوْن قوْيولدوقدان سوْنرا يئني بير چتينليكله اۆزلشنه قدر اللهي ياددان چێخارير و اوْندان بير شئي طلب ائتميي عاغيللاري‌نين اۇجوندان بئله كئچيرميرلر.

بعضي اينسانلاردا دا چوْخ سهو دۇعا آنلاييشي وار. بۇ اينسانلار اۆچون دۇعا اۇشاق ياشلاريندان اعتباراً عائله‌نين ياشلي فردلري طرفيندن اؤيره‌ديلن، بعضي آنلاشيلماز سؤزلردن عبارتدير. اينسانلارين بۇ جۆر دۇعالاريندا اللهين مؤوجودلوغو، بيرليگي، بؤيوكلويو، قۆدرتي، اينسانلاري هميشه گؤروب-ائشيتديگي، دۇعالارا جاواب وئره‌جيي ائله ده نظره آلينمير. آنجاق اولجه‌دن ازبرلنن دۇعا قليبلري تكرار ائديلير. حالبوكي كيتابيميزين دا مؤوزوسو اوْلان اللهين قۇران واسطه‌سيله بنده‌لرينه ائشيتديرديگي دۇعا چوْخ فرقليدير.

قۇرانا گؤره دۇعا ائتمك اللها چاتماغين ان آسان يوْلودور. ايندي بير آنليغا اللهين صيفتلريني فيكيرلشك. اوْ اينسانا شاه داماريندان داها ياخين اوْلان، هر شئيي بيلن، ائشيدندير... اينسانين اۆرگيندن كئچيرتديگي بيرجه فيكير ده اللهدان گيزلي قالماز. ائله ايسه صميمي اوْلاراق اللهدان نه ايسه ايسته‌مك اۆچون اينسانين تكجه فيكيرلشمه‌سي ده كيفايت ائدير. بۇدور، اللها چاتماق بۇ قدر آساندير.

اينسان قۇللوق شعوروندا اوْلدوغو مدت عرضينده الله درگاهيندا ديَر قازانا بيلر. بۇنا گؤره ده اينسان اللها اۆز تۇتمالي، سهولريني اللها اعتراف ائتمه‌لي و تكجه اللهدان كؤمك ايسته‌مه‌ليدير. بۇنلاردان باشقا بير داورانيش طرزي اللها قارشي تكببورلنمكدير كي، قۇراندا بۇنون جزاسي‌نين دا سوْنسوز جهنم اوْلدوغو خبر وئريلير.

حاضيركي جمعيتلرده دقتي جلب ائدن بير مقام اؤزونو بۆروزه وئرير. بۇ، بعضي باشقا عبادتلر كيمي، دۇعانين دا ترك ائديلميش بير عنعنه‌ اوْلاراق نظردن كئچيريلمه‌سيدير. اصلينده، بۇ فيكرين فوْرمالاشماسي‌نين آرخاسيندا «اللهدان مۆستقيل، اؤز-اؤزونه ايشله‌ين بير دۆنيا» اوْلا بيله‌جيي تلقيني دايانير. اينسانلارين اكثريتي ايستر-ايسته‌مز ياشاييشلاري‌نين باشلانغيجيندان سوْنونا كيمي بۆتون حادثه‌لرين اؤزلري‌نين و اطرافلارينداكي اينسانلارين نظارتينده جريان ائدن حادثه‌لر اوْلدوغونو دۆشونورلر. بۇنا گؤره ده اؤلومله اۆزلشمه‌ميش و يا چوْخ بؤيوك فاجعه‌ ايله قارشيلاشماميش، اللها دۇعا ائتمك احتياجي حيسس ائتميرلر. حالبوكي بۇ چوْخ بؤيوك آلدانيشدير. بۇ يانليشليقدا ائله بير سويه‌يه چاتانلار اوْلور كي، بۇنلار دۇعاني سانكي كئچميش دؤورلردن گۆنوموزه قدر گليب چاتميش بير سئهربازليق تاكتيكاسي اوْلدوغونا اينانيرلار. حالبوكي دۇعا حياتين هر ساحه‌سينه مخصوص اوْلان بير عبادتدير.

بۆتون اينسانلار دۇعايا مؤهتاجدير. كاسيب و چتين شرايطده ياشايان بير آدامين ايمكانلي بير شخصه نيسبتن دۇعايا داها چوْخ احتياجي اوْلدوغونو فيكيرلشمك، دۇعا مؤوزوسونو كؤكوندن سهو باشا دۆشمكدير. مادي وضعيتي ياخشي اوْلان، حياتدا بۆتون ايسته‌ديكلريني الده ائتديگيني فيكيرلشن بير اينسانين دۇعايا احتياجي اوْلماديغيني حساب ائتمك دۆزگون دئييل. چۆنكي بئله وضعيتده دۇعا ائتمه‌يين يئگانه سببي‌نين دۆنيوي آرزولارين حياتا كئچمه‌سي اوْلدوغو آنلاشيلا بيلر. حالبوكي مؤمينلر هم دۆنيا حياتلاري، هم ده آخيرتلري اۆچون دۇعا ائديرلر. دۇعا اؤزو ايله بيرليكده توككولو ده گتيرير. دۇعا ائدن اينسان قارشيسينا چێخا بيله‌جك چتين و يا آسان هر جۆر وضعيتي، بۆتون حادثه‌لري كايناتين ياراداني و حاكمي اوْلان اللهين تقديرينه هواله ائدير. بير پروْبلئمي حل ائتمه‌يين، ياخود قارشيسيني آلماغين بۆتون يوْللاري‌نين كايناتداكي قۆدرت صاحبي اوْلان اللها اساسلانديغيني بيلمك، بۆتون ايشلري (تدبيريني آلاندان سوْنرا) اوْنا هواله ائتمك و آنجاق اوْنا دۇعا ائتمك مؤمين اۆچون بير سئوينج و آرخايينليق منبعييدير.