پئیغمبرین گؤزونون نۇرو: ناماز ناماز مئراجین هدیهسیدیر. ناماز اینانانلارین مئراجیدیر. ناماز حاقا یۆكسلمك، كبهیه یؤنلمكدیر. ناماز قلبین “اللاه! الله!” دئیه اینلهمهسیدیر. ناماز اینسان رۇحونون اللها (ج.ج.) “یندئكسلنمهسی،” بۆتون وارلیغی ایله اوْنا (ج.ج.) یؤنلمهسیدیر. ناماز اللهین اؤز بندهلرینه گۆنون مۆعیین ساعتلاریندا تعیین ائتدیگی گؤروش آنیدیر. مؤمین بنده ناماز آنیندا اللهین (ج.ج.) حۆضوروندا اوْلدوغونون فرقینه واراراق اؤز رۇحونو اوْ مۆقدس آتموْسفئرده یۇیور، تمیزلهییر، معنوی پاكلیغا جان آتیر. ناماز حقیقی شۆكرون ایفادهسیدیر. مخلوقلارین اشرفی، ان اۆستونو اوْلاراق یارادیلان اینسانا گؤستریلن ان مۆناسیب شۆكور یوْلودور ناماز. ایگیرمی دؤرد ساعت كیمی دیَرلی خزینهنی بخش ائدن سوْنسوز قۆدرت صاحبینه همین ساعتلاردان بیرینی حصر ائتمكدیر ناماز. ناماز اللهلا دیالوْقدور، اوْنون (ج.ج.) گؤندردیگی دیلله یئنه اوْنونلا دانیشماقدیر. ناماز اوْنون (ج.ج.) قارشیسیندا عاجیزلیگین، صمیمیتین، علاجسیزلیغین، یالواریشین، دیز چؤكمهنین ایفادهسیدیر. ناماز اینسانین یارادانلا مۆناسیبتینی دایما جانلی ساخلایان واسطهدیر. ناماز گۆناهلارا قارشی سیپردیر. الله (ج.ج.) اخلاصلا قێلینان ایكی ناماز آراسیندا ایشلنن گۆناهلاری باغیشلایاجاغینی ود ائدیر. بۇ وعده اۆمیددیر ناماز. ناماز حاقا گۆونمكدیر، اوْنا (ج.ج.) سێغینماقدیر، سوْنسوزا دوْغرو ایرهلیلهمكدیر. ناماز حاقا عسگر اوْلماقدیر، اطاعتدیر. ناماز قۆرورون سێنماسی، آلنین یئره سۆرتولمهسیدیر. یالنیز و یالنیز اللها (ج.ج.) عبادتدیر ناماز، باشقا سجدگاه تانیماماقدیر. ناماز رۇحون قیداسیدیر. “روهونو بۇ قیدا ایله دوْیورمایان منن اؤلموشدور” - دئمكدیر. نامازسیزلیق رۇحسوزلوقدور. ناماز ابدیت یوْلچولوغونون یئگانه بیلئتیدیر. ناماز اۇجوز قییمته آلینان بؤیوك مۆكافاتدیر. قۇروموش رۇحلارین، تۆكنمیش اۆمیدلرین، چۆروموش كؤنوللرین یئنیدن جانلانماسی، شاهلانماسی، نۇرلانماسیدیر ناماز. ناماز مئراجین هدیهسیدیر. اینسانلارین مئراجیدیر ناماز. ناماز حاقا یۆكسلمك، كبهیه یؤنلمكدیر. ناماز قلبین “اللاه! الله!” دئیه اینلهمهسیدیر. ناماز دینین دیرگیدیر. “نامازسیز اینسان دینینی یێخمیشدیر” دئمكدیر، “نامازسیز اینسان دینین مسئولیتی آلتیندا ازیلمیشدیر” دئمكدیر. ناماز ایسلامین بۆتون شرطلرینی ائهتیوا ائدن عبادتدیر. ناماز ایسلامدیر. ناماز گۆنون پروْقرامیدیر، مؤمینین ساعتیدیر، واختین بركتلنمهسیدیر. ناماز قبیر ملكلرینین سۇاللارینا جاوابدیر. جهنمین آتشینی سؤندورن بیر داملا گؤز یاشیدیر ناماز. ناماز اؤلومو اؤلدورمكدیر. ناماز ایمانین ان بؤیوك شاهیدیدیر. ان وفالی دوْستدور ناماز. ناماز رۇحون آزادلیغی، ویجدانین راحتلیغیدیر. ناماز مؤمین اۆچون قاناددیر. ناماز ابدی و راحت حیاتدیر!